Nimin (14.09.2018) khan School Education Department leh Art & Culture Department tangdun bultumin Chanmari YMA Hall-ah High School leh Higher Secondary School zirlaite tan Mahatma Gandhi piancham 150-na lawmna chi khat atan State Level Drama Competition neih a ni a, school hrang hrang 7 atangin team 7 ten lemchan intihsiak an nei a ni.

Lemchan intihsiakah hian Synod Higher Secondary School chu Pakhatna an ni a, lawmman pakhatna hian chawimawina thuziak leh tangkafai Rs. 10,000/- a keng tel a ni.

School dang 6- Kendriya Vidhyalaya Higher Secondary School, St.Paul's Higher Secondary School, St.Joseph's Higher Secondary School, Govt.Mamawii High School, New Horizon School of Education Higher Secondary School leh Govt. Mizo High School ten Participation Prize an dawng a, Participation Prize hian Chawimawina thuziak leh tangkafai Rs. 5,000/- a keng tel a ni.

State Level-a pakhatna hi tunthla September ni 23-25, 2018 chhunga New Delhi-a National Level Competition ah state aiawhin an tel ang.