Vawiin khan Swatch Bharat Abhiyan (Cleanliness Drive) chu Sports & Youth Services Department buatsaihin neih a ni a, District bawrhsap Dr. Naveen Aggarwal chuan khuallian niin a hawng.

Thusawiin khuallian chuan Mizo mipuiten faina chungchangah inzirtirna tha tak kan nei thin hi a lawmawm hle a ni a ti a, faina hi kan ngaihpawimawh chuan khaw changkang nih kan hlat lo a ni a ti a, khawlaia bawlhhlawh hmuh tur awm fo hian kan khua mai bakah a chhunga cheng te mualphona a thlen a ni a ti a, mitin ten kan dawr leh in kawt te tihfai kan uar deuh deuh hi a ngai a nk a ti. Vantlang hmun pawimawh leh kan kawngpui dung te mimal ta ni miah lo mahni ta ang a tlawmngai taka kan tifai thin hi a lawmawm hle a ni a ti a, kan khawtlang tana hmun pawimawh, vantlang zun in leh ekin te hi tithianghlim deuh deuh tur leh kan khawlai mai bakah mahni taksa pawh invawn fai zel a tul a, kan hriselna atan pawh kan chhehvel leh kan taksa kan enkawl fai hi a pawimawb em em a ni a ti a, kalkhawm zirlai te chu duhsakna a hlan a, Cleanliness week hi a hawng a ni.

Pi Laldinfeli MCS, DSYO kaihhruainain inkhawm tawi neih a ni a, hun hman zawhah khawlai tifaia hnatlang hi chhunzawm nghal a ni. He hunah hian Govt. Champhai College, Govt. GM High School, Govt. GM HSS NCC leh NSS te sawm an ni a, Vengthlanv Middle School leb PES Vengthlang Scout & Guide te leh Sport Association hranv hrang te sawm an ni bawk. 

Kalkhawm te chu thuang thum ah inthenin Vanlallawma Indoor Stadium atanga bul tanin kawng peng thuam tinah insemdarh zelin DK Traffic Point ah an intawk khawm leh a, Chhangphut field a bawlhhlawh awm te chhar fai leh a nih hnuah kharna hun hman a ni.