Nimin atanga neih tan INSPIRED Award State Level Science Exhibition cum Project Competition, SCERT leh DEO Serchhip te buatsaih Government Serchhip High School a neih chu vawiin hian zawh fela khar ni a. National Level a inelnaa Mizoram aiawha tel tur zirlai naupang panga (5) te hnenah Certificate leh lawmman hlan nghal a ni.

A kharna inkhawm, Serchhip BNRGSK Hall a neih hi Pu F. Lalliansanga, Science Consultant, SCERT in a kaihruai a, Pu K. Saitluanga, District Information and Public Relations Officer, Serchhip chuan naupang leh zirtirtu kalkhawmte hmaah fuihna thu sawiin, National Innovation Foundation aiawha lokal Pu Rajiv Mili, IIT Gauhati pawhin an hmalak dan sawifiahna hun a hmang bawk.

He Exhibition cum Project Competition a ti tha, National Level a kal zel tur mi panga te hnenah Serchhip DEO Pu Lallawmawma chuan lawmman a hlan a. Lawmman dawngtute chu H. Vanlalmuanzuali, Hnahthiak English Congregation School, Vanlalmalsawmi, Aided Middle School, Keitum, Lalmuansangi Presbyterian English School, Chhingchhip, Lalfakzuala Zadeng, Baptist Higher Secondary School Lunglei leh PC Vanlalveni, Buangpui RMSA Secondary School te an ni.

India ram in Science and Technology leh Research lama hma a sawn zel theihna tura Grassroot Level Programme pawimawh ber te zinga mi, INSPIRED Award Exhibition Cum Project Competition, 2016 Serchhipa neih hi Mizoram chhunga High School zirlai naupang, Class 6 atanga Class 10 inkar a mite tana buatsaih a ni a. Ruahmanna ah chuan District tinin District Level Competition an neih hnuah a ti tha zual thlan chhuahten State Level Competition an nei leh tur a ni a. Amaherawh chu District, mahni puala Competition buatsaih tlin lo an awm tin avangin kuminah hian District Level leh State Level hi a ruala buatsaih niin Serchhip ah hian nghah a ni ta a ni.

He Exhibition cum Project Competition ah hian zirlai naupang 62 ten an Model hrang hrang te an pho lang a, zirlai naupang leh mipuiten tlawhin chung mite hnenah chuan an Model te chu an sawifiah sak zel a ni.