Ni hnih awh (15 - 16 March) State Level Farmers’ Meet – cum – Exhibition Vanapa Hall-a neih chu vawiin khan chhunzawm leh a ni a. Vawiina Loneitute inkhawm Agriculture Director Dr. C. Lalzarliana kaihhruai hi loneitute zirtirna hun (Technical Session) atan hman a ni a. Dr. H. Saithantluanga, Deputy Director (Planning) chuan Agriculture hnuaia Mizoramin hmasawnna hrang hrang a lo neih tawh - Oil palm-a hmasawnna sawiin Mizoram pumah Oil palm 9345 hectares-ah chin a nih tawh thu te, Buh thar lama kawng hrang hranga hmasawnna te loneitute a hriattir a. 12th Plan chhunga Agriculture Department-in hmalak a tumna kawng hrang hrangte a tarlang nghal a, heng hmalakna tur hrang hrangah hian loneituten thui tak mawh an phurh thu a tarlang nghal bawk.

He hunah vek hian Pu R.K. Nithanga, Deputy Director (Soil Survey) chuan Oil palm chin dan leh sorkarin hma a lak dan te a zirtir bawk a. Pu J. Rothanga, SO – cum – SA pawhin Buh chin dan chi hrang hrang – System Rice Intensification (SRI),Improved Package of Practices (IPP) leh Improved Jhum chungchang zirtirna a pek bakah sawihona hun tha tak an hmangho a.