State Level Fire Prevention Committee chu vawiin dt. 5th January, 2015 hian Pu Lalrinmawia Ralte, Minister of State, Environment & Forest Co-Chairman, State Level Fire Prevention Committee kaihhruaina in ama office chamber-ah neih a ni a. Pu Lalrinmawia Ralte, Co-Chairman chuan Chairman, Chief Minister zahawm tak remchan lohna avanga a hova meeting neih anih thu sawiin members lo kalte kumthar chibai bukin duhsakna a hlan a ni. 

He meeting ah hian kumin 2015 chhunga kangmei chhuak venna tura dt. 8.2.2014 a Sub-Committee in ruahmanna a lo siamte uluk taka zirin thlirho a ni a. Sub-Committee Pu Lalrinmawia Ralte, Minister of State, Environment & Forest Chairman-na hnuaia dinin a lo ruahman chu pawmin Fire Prevention Week chu 19th - 24th January, 2015 chhungin hman ni se, Week Hawnna hun 19th January, 2015 ah neih nise, he hunah hian Chief Minister chu Khuallian atan beisei a ni bawk. Tin, lo leh huan hal hun atan 15 March, 2015 hma ni tura Sub-Committee lo ruahman chu pawmin Lengpui Airport leh a chhehvel khua, heng Lengpui, Lengte, Nghalchawm, Sairang, Khamrang, Kawnpui, Serzawl leh Hortoki te chuan lo leh huan hi tlai dar 3:00 hma a hal lo tura ruahmanna lo siam turin District Bawrhsap in hma lo la se tih a ni bawk. Hei bakah hian kangmei tichhuak lo leh kangmei ven kawnga hnathawk tha District leh khuate lawmman Sub-Committee rawtna siam chu pawmin District Level-ah pakhatna atanga pathumna thleng lawmman siamin citation leh pawisa fai Rs. 50,000/-, Rs. 30,000/- leh Rs. 20,000/- pek nise. Tin, District tinah kangmei ven kawnga titha khuate 1st atanga 5th thleng thlang chhuak a lawmman pawisa fai Rs. 50,000/- Rs. 30,000/-, Rs. 20,000/-, Rs. 15,000/- leh Rs. 10,000/- leh citation pek nise tih te pawm a ni bawk.

District Level inelna endiktu atan hian Tlawmngai pawl hrang hrang te, MUP, ASEP, SENVA, NSS, STAM, AMFU leh CYMA te ruatna pawh pawm a ni bawk.

Kumin hian kangmei laka kan fihlim theih nan theihtawp chhuah nise a, theih anga tam leh a remchan dan angin awareness neih committee chuan tha a tiin DDK ah Talk Show te buatsaih a Electronic Media hmanga inzirtirna te buatsaih ni bawk se.

Tin, meeting chuan dan pawisa lova ram tikangtute hriat anih theih nan leh a tul anga an chungah action lak anih theih nan khawtin V/C te leh Local Council te, lo vat khua leh lo hal tur nei chhungtinte an hming list buatsaih a PCCF a thehlut tura tih niin hei hi LAD lamin lo bawhzui tura tih a ni bawk.

He meeting ah hian kangmei ven kawnga hmalakna chak zawka kalpui anih theih nan District Level Meeting ah Monitoring Agency te tel ngei tura tih a ni bawk.

He meeting ah hian State Level Fire Prevention Committee members atan General Administrative Department (GAD), Disaster Management & Rehabilitation (DM&R) Department leh State Pollution Control Board te ruat belh an niin Sub-Committee, State Level Fire Prevention Committee Member atan Green Mizoram Network (GMN) rawtna pawh pawm a ni bawk.

He meeting ah hian Pu Lalram Thanga IFS, PCCF, Pu R. Lalvena IAS, Secretary, UD & PA te leh Environment & Forest Department hotute bakah members te an tel tha hle a ni.