Vawiin chawhma khan Chief Minister Conference Hall-ah State Level Fire Prevention Committee chuan Pu Lalram Thanga, Principal Secretary & PCCF kaihhruaina hnuaiah ramkang ven kawnga hmalakna tur relin an thukhawm.

He committee hian a hnuai ami ang hian ruahmanna a siam a ni:

Kumin atan Fire Prevention Week February chu ni 12-17, 2018 chhunga hman tura ruahman niin, thupui atan “Ram tikang lo turin mitin i fimkhur ang u” tih chu thlan a ni.

Huan/Lo hal hun hi kum dang ang bawkin March 15, 2018 hma ngeiin Huan/Lo neite chuan zo hman se, hemi kawngah hian District thuneitu in khauh takin dan kengkawh tura beisei an ni.

Ramkang ven kawnga District leh Khua tithate leh Huan/Lo hal hun bituk chhunga hal leh hal lo enfiah leh a, NGO ten VC leh khawtlang hruaitute rawn chungin enfiah tura intirh leh niin District leh Khua tithate lawman pek tura rel a ni a, endiktu turte chu Nodal Department in lo ruat dawn a ni.

Ramkang ven kawnga District leh Khua tithate lawmman bituk zat chu District ah 1-na Rs 50,000 + Running Trophy + Certificate; 2nd Prize Rs 30,000 + certificate; 3rd Prize Rs 20,000 + Certificate pek tura ruahman niin, Khua tithate chu 1-na Rs 50,000; 2-na Rs 30,000 leh 3-na Rs 20,000.

Mipui hnena zau zawka ramkang ven leh fimkhur a tul zia te leh committee hmalaknate inhrilhzau zawk a nih theih nan hmalak a, video clip leh animation hmang te in leh thuchah/thuziak(flyer/pamphlet/leaflet) hmanga inzirtirna pek a nih theih nan ruahmanna siam turin vawiin thukhawm chuan a rel bawk a ni.

Fire Hydrant khawchhung hmun pawimawh a bun hi kangmei chhuah palh a hma lak zung zung a nih theih nan a bul hnaiah lirthei emaw hmanraw dang emaw reng reng dah lo tura zau zawka mipui hnena zirtirna leh hriattirna pek ni se tiin committee hian a rel bawk a ni.