Vawiin khan Pu R. Romawia , Art & Culture Minister chuan ni hnih awh tur State Level Library Seminar and Training for Rural Libraries vawi 11-na chu Chanmari YMA Hall-ah a hawng.

Art & Culture Minister chuan Library chu finna dahkhawmna a ni tiin lehkhabu tha tak tak haichhuak peih apiang mifing an lo ni thin a ti a. Library neih that hi hnam changkanna kawng khat a nih thu a sawi a, lehkhabu-a miten finna anlo chhekkhawl hi vawnghima hmang tangkai lehzual turin mipuite a chah a ni. Pu R. Romawia chuan mifing apiangin zirtur an la ngah tih an inhria tiin, zirtirtu te phei chu zirlai te hriatna zau zawk an pek theihnan inchhiar zau zel turin a fuih a. YMA ten thahnemngai taka Library an lo enkawl thin chu lawmawm a tih thu sawiin , Mizorama Library –te alo changtlun zawk nan tha thlah lova theihtawp chhuah zel turin Art& Culture Minister chuan kalkhawmte a chah bawk a ni.

State Level Library Seminar & Training for Rural Libraries –ah hian Mizorama Library tha zual te hnenah lawmman tangkafai leh certificate sem a ni a. Mizoram pum huapa Library tha thlanchhuahte chu- Pakhatna- Chanmari Branch YMA Library Aizawl; Pahnihna – Chaltlang Branch YMA Library Aizawl; Pathumna- Bethlehem Vengthlang Branch YMA Library Aizawl te an ni a. Hemi bakah hian District tina Rural Library tha thlana lawmman pakhatna dawngtute chu:

1. Aizawl District (Outside Aizawl City): Chawngbuaia Memorial Library, Joint YMA, Saitual

2. Aizawl District (Aizawl City): Chanmari Branch YMA Library, Aizawl

3. Lunglei District : Bazar Veng Branch YMA Library, Lunglei

4. Kolasib District: Kawnpui Chhim veng Branch YMA Library

5. Champhai District: Khawzawl Vengthar Branch YMA Library

6. Serchhip District: East Lungdar Branch YMA Library

7. Mamit District: Vengpui Branch YMA Library, Zawlnuam

8. Siaha District: New Colony Branch YMA Library, Siaha

9. Lawngtlai District: Vathuampui Branch YMA Library

Hawnna inkhawm hi Art & Culture Director in a kaihruai a, Pi Thanhliri Pachuau Secretary, Art & Culture Department chu khual zahawm niin Library tha nei tura Record vawn that a pawimawh thu leh hemi lama tan la turin library enkawltute a chah a ni. He hunah hian Library& Information Science a Ph.d hmutharte hnenah lawmpuina leh chawimawina hlan a ni bawk.

State Level Library Seminar & Training for Rural Libraries hi kum khat dana neih thin niin Art & Culture Department, Raja Ram Mohan Roy Library Foundation (RRRLF) Kolkata leh Mizoram Library Association tangkawpin buatsaih a ni a. Chawhnu lamah Library Seminar-in a chhunzawma naktukah Library Training neih a ni bawk ang.