Vawiin chawhma khan Commerce and Industries Minister, Pu H. Rohluna chuan ‘Emerging trends in Food Processing & Safety Challenges’ Workshop Aijal Club a neih chu a hmanpui. He Workshop hi Commissioner of Food Safety, Health and Family Welfare Department in an buatsaih vawikhatna niin Nestle Company bultum a ni.
Pu H.Rohluna chuan ei leh in kan siamchhuah te chu ram mipui chauhin hmang tangkai lovin state pawn lamah pawh mumal zawka thawn chhuah anih theih nan hmalak a ngaih thu sawiin Mizoramah hian khawchhak lam atangin eitur chi hrang hrang tawng hriat loh a inziak rawn lutin hemi kawngah hian zirchianna neih bakah fimkhur a ngaih thu a sawi a. Food Processing Industry lama hmasawn nan leh marketing thlenga kan in zarpharh theih nan Company dang nena tan ho te, zau deuh zawka thlir dan tha neih te pawimawh a tih thu sawiin hei hian thalai hna hmulo te tan thawhna tur siamsakin hriselna kawngah pawh mipui kan lo harh chhuah zel na atan a pawimawh thu Minister chuan a sawi a ni.
He hun hi Principal Director Health &Family Welfare, Dr. K. Ropari chuan kaihruaiin Pu Sujit Kumar Ghosh, Corporate Affairs Manager-East, Nestle leh Deputy Food Safety Commissioner, Pu Lalsawma te’n thu an sawi a. Nestle Quality Manager, Pu Naveen Chawla chuan presentation a pe bawk a. Workshop-ah hian District hrang hrang atangin Food Safety Officer bakah Food Processing Unit neite an tel a. Tunah Food Processing Industry hnuaiah hian license 339 leh registration 1245 siam a ni tawh a ni.
