Vawiin khan sorkar laipuia Ministry of Power, Mizoram sorkar leh North Eastern Electric Power Corporation (NEEPCO) tang hovin an buatsaih, State Level Painting Competition on Energy Conservation-2013 kharna hun Chanmari YMA Hall-ah hman a ni a, Addl. Chief Secretary Pi M. Sathiyavathy chuan Khuallian niin a hmanpui.
India rampuma Energy renchemna tura inzirtirna leh inhrilhhriatna atan State leh Union Territory zawng zawngah zirlai naupangte tan lemziaka intihsiakna hi kumtin 2005 atang khan neih thin a ni a, Mizoramah pawh North Eastern Electric Power Corporation (NEEPCO) chuan Mizoram chhunga zirlaite tan Painting Competition hi kalpui a ni.
Pi M. Sathiyavathy chuan, Painting Competition on Energy Conservation neih a ni chu naupangte talent haichhuahna atan leh energy renchemna kawnga zirtirna hmanraw tangkai tak a nih thu sawiin, zirlai naupangte chu renewable leh non-renewable kan neihte, ren taka hmang tura chahin, inchhunga eng leh energy dang tul lova kan hman thin te kan tihtlem chuan zaa-sawmhnih lain kan hman zat a tlem sawt dawn tih sawiin, lirthei inhmantawm te uar lehzual a ngaih thu a sawi bawk.
Nu leh pa te leh zirtirtute chu naupangte talent hrang hrangte peipunna atana hma la zel tura chahin, an tuina leh chemkalna te phurpuia, an tuizawngah hmasawnna an hmuh zel theih nana kaihhruai turin a chah bawk. Mizoram chhunga zirlaite chu he competition-a tel uar zel tura fuihin, India hmarchhaka tel hnem ber State nih tum tur leh India ram pum huap pawha lawmman an dawn theih nan duhsakna a hlan bawk.
He hun hi Dr. S.S. Chowdhury, Dy. Chief Medical Officer, NEEPCO chuan kaihruaiin, Pu Ajay Kumar, Senior Manager (HR) NEEPCO Ltd. chuan inlawmna thu a sawi a; Pu B.Datta, DGM (Civil), NEEPCO bakah lemziak endiktute aiawhin Pu Rozamliana Ralte hnen atangin thusawi tawi ngaihthlak niin; Dr.P.R.Saikia, Senior Manager, NEEPCO chuan lawmthu sawiin hun a khar a ni. School Education Director, Pu P.Lalchhuanga leh Jt. Director, Pu J.H.Biakmawia ten an telpui bawk.
State Level Painting Competition on Energy Conservation- 2013 hi category A leh B-ah te neih a ni a. Category A hi Classes-IV, V leh VI-te tana neih niin, pakhatna chu Amitha, Kendriya Vidyalaya, Zemabawk niin, pahnihna- Samina Begum, JNV, Kolasib leh pathumna- Lalnunhlua Ngente, Govt. Middle School- III, Bilkhawthlir te an ni a. Category-B hi Classes-VII,VIII,IX te tana buatsaih niin,pakhatna-L.Biswarupee Singha, Kendriya Vidyalaya, Project Pushpak, Zemabawk, Pahnihna- David Lalthasiama, St. Lawrence School, Aizawl leh pathumna- Lalhmangaihzuala, Govt. Middle School-II, Tlungvel te an ni a. Lawmman 1-hian Rs.10,000/- leh certificate, pahnihnain Rs.8000/- leh certificate leh pathumnain Rs. 5000/- leh certificate an dawng a, Consolation prize hi category tinah mi 10 hnenah Rs.1000/- theuh pek an ni bawk. Categry A-a lawmman 1,2 & 3 late hi Delhi ah National level competition-ah an tel anga, Category B atanga 1,2 & 3 te hi an lemziak thawm thlak a ni bawk ang.
