Mizoram chhunga rel kawng tih hmasawn zelna tur ngaihtuahtu State Level Task Force chu vawiin khan an Chairman Pu Zasanga hovin I & PR Conference Hall-ah an thukhawm. Meeting-ah hian Northern Frontier Railway hnuaia he rel kawng siamtu construction ami Chief Engineer P. Shrivastava leh Dy. Chief Engineer Raju Das te pawh an rawn tel a. Mizoram sorkar department hrang hrang aiawh bakah Pu C. Ramhluna, Pu  Hmingdailova Khiangte, MLA te leh Pu R.K. Thanga, IRTS (Rtd.) te pawh an tel a ni.

Vawiin committee chuan committee hmasa lama thurel leh bawhzui dan tlangpui a thlirlet a. He committee Chairman mamawh motor leh office thil chi hrang hrangte chu ngaihtuah sak mek a nih thu leh hun reilote chhunga a mamawh phuhruk tum a nih dan te sawilan a ni a. Bairabi atanga Sairang thleng rel kawng siamna tur hmunah te chuan LSC thar pek chhuah tawh loh nise tih te chu Revenue Deptt. leh Aizawl DC in chak taka lo bawhzui tura rel a ni a. Hnathawktute mamawh hmasa khualbuk, venhimna lam, tui leh eng chungchangte pawh vawiin meeting-ah ngaihtuah zingah a tel a ni.