Vawiin khan Science Promotion Wing, SCERT huai hawtin State Level Science Drama Competition vawi 5-na chu Chanmari YMA Hall-ah buatsaih a ni a, he programme hi School Education Minister Pu H Rohluna chu khuallian niin leh Parliamentary Secretary Pu Joseph Lalhimpuia chu khualzahawm niin an hmanpui a ni.
Khuallian Pu H. Rohluna chuan vawiinah hetiang hun pawimawh takah a tel thei chu lawmawm a tih thu a sawi a. Thuchah tha tak sawi thei tur Drama hmuhnawm tak hmuh a in beisei thu leh school naupangte leh thalaite zingah talent nei tha tak tak in awm a, chung in talnent te chu phochhuak turin SCERT in ruahmanna tha tak a siam sak che u a ni, a ti a. Chu chu hmang tangkaia nakin zelah pawh nangmahni tan chang ni lova kan society ah in chet zia drama atangin in entir thei a. Hnam upa leh state upa zawkte drama lamah kan la pha lo mai thei, chung ho talent neih ang chu keimahni ah hian a awm ve ngei a ni tih kan hriat a tha a, chung in talent neihte chu thalai zirlaite hian ram tan hian in phochhuah thiam a hun takzet a ni a ti bawk.
Khual zahawm Pu Joseph Lalhimpuia, Parliamentary Secretary pawhin khawvel leh hnam changkang apiangin drama hi an lo ngaisang in an ngaihlu thin hle a ni tiin drama zirte chuan zirna mai bakah rilru leh tangkam hman dan ah pawh hma an sawn zawk tih an hmuhchhuah thu a sawi.
He intihsiakna hi High School zirlai naupangte tan buatsaih niin, Govt. R.M High School, St. Paul’s High School leh Staines Memorial High School te an tel a. Staines Memorial High School chuan pakhatna an la a. Best Actress lawmman chu Malsawmdawnglaini, St. Paul’s High School ; Best Script lawmman chu Pu V.L. Dinpuia, Govt. R.M. High School leh Best Director lawmman chu Lalrammuana, Staines Memorial School te hian an dawng a ni.
He drama competition in a tum ber chu zirlaite, zirtirtute leh Science zirna lama mi tuite tih phur nan leh Science zirna tihhmasawn nan leh a tangkaina drama hmanga puanchhuah a ni a. Kumin Drama Theme a tan hian Science & Society tih hman a ni a.
Drama Competition a pakhatna hian Mizoram aiawhin kumin October ni 17 khian Regional Science Centre Guwahati-a Hmarchhak huapa North East Zonal Level Competition-ah an tel ang. North East Competition a tit ha pahnih te chu National Level Drama Festival-ah nakum January ah an tel ang.
