State Level Student’s Science Seminar vawi 31-na chu vawiin khan Vanapa Hall-ah neih a ni a; Education Minister Pu Lalsawta’n a hmanpui. Seminar hi Science Promotion Wing SCERT in a buatsaih a; Seminar thupui chu ‘Chemistry for Human Welfare: Promises and Concerns’ tih a ni.  

Pu Lalsawta chuan Science leh Mathematics chu hmasawnna rahbi a nih thu sawiin Zirlai kalkhawmte chu an zirlai mek leh an zirna kal zel turah heng subject pahnih pawimawh dan chu engtik lai mah in a kiam dawn loh a ni a ti . Minister hian Zirna kalphung kum sawmhnih vel kalta khan nasa taka a danglam chho dan sawiin tunah chuan sorkar hnuaiah  hna hmuh a harsat tawh avangin lehkhathiam hna hmu lo tam tak an awm thu a sawi.

Pu Lalsawta chuan hnathawh nan leh hna hmuh nan thiamna  bakah tunlai khawvel in her danglam zel mil a zirna leh thiamna neih a pawimawh leh tul a tih  thu a sawi. Zirlai kalkhawmte chu an zirlai ah  taimakna, tumruhna leh inpumpekna nen theihtawp chhuah turin a fuih bawk a ni.

Programme a hian Pi Malsawmthangi Director SCERT chuan inlawmna thu tawi a sawi a, Pu R S Chauhan Dy. Director SCERT chuan Report pe in Seminar kalpui a lo ni tawh dan te a report ah hian a tarlang a.

He Seminar ah hian District Level a titha zirlai 16 te chuan Seminar thupui sawiin inelna an nei a, Written Test an nei bakah a Endiktute (Judge) Zawhna an chhang tel bawk a ni. St.Paul’s HSS zirlai Saidingpuii Sailo chuan lawmman pakhatna a la; Malsawmtluangi Govt. Chaltlang HSS leh C. Lalrawngbawla St. Peter’ s HSS Chhingchhip te chuan lawmman pahnihna leh pathumna an la a ni.

Sikul sawmhnih chuang atangin zirlai thahnem takin Seminar hi an zirtirtute nen an chhim. Seminar hi kum tin National Council of Science Museum leh Birla Industrial & Technological Museum Kolkata te tangkawp chuan an buaipui thin a. State Level Seminar a pakhatna hian tun thla ni 30 a Delhi a National Student’s Science Seminar- ah Mizoram aia a awh ang. Hun kalta khan Mizoram aiawhte chuan National Level a vawihnih lai lawmman an lo la tawh a ni.