Nimin tlai dar 2:30 khan Champhai District Bawrhsap Pu Vijay Kumar Bidhuri chuan a office chamber ah Champhai a thuthar lakhawm tute kawmin Champhai District chhunga sawrkar hmalakna hrang hrang leh hmachhawp bakah harsatna tawh te a sawipui.

He inkhawm hona hunah hian District Bawrhsap chuan NLUP kalpui mekah Champhai District chhungah beneficiaries 5961 an awm a, chung zinga 4714 hnena 1st Instalment pek anih tawh thu a sawi a. Sericulture leh Forest Department hnuaia mite hnenah 2nd Instalment pek a ni tawh bawk a, la pek loh chu Industry Trade thlangtu an nih thu te sawiin 1st Instalment atan hian Rs. nuai 1087.63 leh 2nd Instalment atan Rs. 108.66 sem chhuah tawh a ni a ti a. BNRGSK  building chu khaw 40 ah sak tawh a niin NLUP link road 84 laih a ni tih a sawi bawk.

Dan leh thupek kenkawh chungchang sawiin Police, Excise, SIB, Customs, Assam Rifles te nen meeting an neih thin thu leh an hmalakna turte an duan thin thu sawiin ruihhlo zuar tute chungah zahngaihna an lan tir dawn lo tih sawiin a ti thin te chungah erawh zahngaihna an lan tir theih thu a sawi. Bawrhsap chuan Champhaia Police Department a thawktu indaih lo leh sum indaih lohna avangin duhthusama hma an lak theih loh thu sawiin hemi phuhru tur hian Inspector 1, Sub Inspector 5 leh ASI 4 mamawh a ni a, motor 4 leh Prison  Van 1 mamawh belh a nih thu te leh Champhai Police Quarters te chu sak thar an ngai tawh hle a, heng hi sorkar ah thlen anih thu te sawi a ni.

MGNREGS ah Champhai District ah hian job card nei 26,396 an awm tih a sawi a, naupangte tan nitin chhun chaw pek bakah kar khatah artui sem a ni a, school hrang hranga zirtirtu inrualkhai lo in harsatna a thlen dan te leh Health Department in veivahna an neih that loh avanga harsatna an tawh dan te leh naupang specialist mamawh anih thu te DC chuan a tarlang a ni.

Bawrhsap chuan Champhai District chhunga khaw 2 Vankal leh Salem tih loh chu eng pek vek anih tawh thu sawiin, heng khaw 2 te hi kumin krismas hma ngeia pek an beisei a, BPL chhungkua te tan a thlawna eng pek dan turah survey neih zawh tawh a ni tih a tarlang. Champhai District ah hian mi 1,25,370 an awm laiin ration card 182,324 a awm a, ration card dik lo 3791 hmuhchhuah tawh niin heta pawisa luangral zat hi kum khatah Rs. vaibelchhe 5.6 ang vel anih thu a sawi.

Champhai District a hmalakna zingah changtlung taka CHAMUL kalpui anih dan Bawrhsap chuan a sawi a. Multiple cropping te, Auditorium mamawh anih thu te leh Zawlaidi wine siam chhuahna tur grepe variety tha zawk enchhin mek a ni a, nakum hian field trial neih anih tur thu a tarlang a, hei bakah hian National Social Assistance Programme, Champhai District Level Committee din anih tur thu te a sawi bawk a ni.

Nimina Press mite a kawm nanah hian District Bawrhsap chuan ama mimal thahnemngaihna atanga a buatsaih Champhai District Information & Redressal System chungchang sawifiahin he lehkhabu hi sorkar-in hma a lakna leh hnathawhna kawng hrang hrangah mipuite tana thawktu an nihna leh mipui rawngbawltu an nih angin mipuite tana awlsam, zangkhai leh chak zawka hmalak anih theih nan buatsaih anih thu a sawi a. He lehkhabu hi Champhai District chhunga V/C te hnenah thawn darh mek a ni, a ti a. Office tinah mipuite thil hriat duh hrilh tu tur staff hming leh phone number tarlan vek a ni a, chutah chuan mipuiin an thil hriat duh an zawt anga, an lo chhang tha duh lo emaw an be pawp thei lo anih chuan DC Office ah zualkona tur District Information and Grievances Redressal Cell din nghal a niin Control Room buatsaih a ni, a ti bawk.

Control Room - Phone No. 03831-234882/9862225304
Dealing Assistant - PA to DC - 9436145514/03831-234402
Nodal Officer - Lalfakzuala, MCS - 986280482/03831-234475