Sub. Hqrs YMA Lunglei leh Basketball Association Lunglei tangkawp buatsaih Inter Branch YMA Basketball Tournament chu Vawiin ni  Chawhma Dar 11:00 khan Lunglei South bialtu Pu S.Laldingliana, Parliamentary Secretary-in Lunglawn Basketball Court tharah a hawng. Hawnna Inkhawm hi Session hnih-ah then a niin session khatna hi Pu K. Zodingliana, VCP, Lunglawn in a kaihruai a. 2nd Session chu Pu Kaisanga Ralte, Chairman, Sports Committee Sub. Hqrs. Lunglei in a kaihruai thung. He hunah hian President, Basketball Assn. Lunglei hnen atangin Technichal Report ngaihthlak a ni a, Pu Chalrosanga, MBA President hnen atangin thusawi ngaihthlak a ni bawk.

He huna Khuallian Pu S. Laldingliana chuan Basket Ball court thar a hawn hnu-ah thusawiin, \"Cho chhuah tham talent nei thalai duhawm tak takte hian, kan thiam kan theihna te hi ti pungin, infiamna hmang hian Zoram hi ram dang te hriatah kan phho chhuak tur a ni. Chutiang tur chuan kan zavaiin tan i la thar theuh ang u\" tiin infiam mite a fuih a. A sawi zelna-ah Pu Dinga chuan, \"Thalaite hmakhaw ngaitu sawrkar  kan nei hi a lawmawm em em a, tunah pawh hian Lunglawn khelmual bul maiah hian Sports Multipurpose Complex din tumin hma lak mek a ni a, kan zavaiin a rah kan la seng tlan ngei ka beisei tlat a ni\" tiin Lunglawn Basket ball court chu court puitling leh changtlung zawka peih thuai a nih tur a sawi a. Digital Scoreboard pek an nih thu a sawi bawk.

He Inter YMA Basketball tournament-ah hian Lunglei khawpui huamchhung branch hrang 7 atangin team 12 an tel a. He tournament-ah hian Champion-in lawmman tangkafai Rs.5000 leh citation  dawngin pahnihna in tangkafai Rs.3000 leh citation an dawng bawk ang. He tournament kharna hun hi Sept. ni 9, 2011 (Zirtawpni) chawhnu dar 2:00 hian Pu Joseph Lalhimpuia, Vice Chairman, HPC, Lunglei hova neih a ni ang.