Vawiin khan Transport Minister Pu P.C. Zoram Sangliana chuan Pangbalkawn, Kolasib District-ah Bharat Nirman Rajiv Gandhi Sevak Kendra (BNRGSK) building, MGNREGS hnuaia V/C House sak a hawng. Hei hi Kolasib Assembly Constituency chhunga sak zawh hmasak ber a ni.

Ribbon chepchata V/C House a hawn zawhah thusawiin Minister chuan hmasawnna pawisa reng reng hi dik taka hman hi kan tih tur a ni a. Dik taka kan hman chuan kan khawtlang leh kan ram tan rotling kan siam zel dawn a ni, a ti. Kolasib District chhunga hmasawnna hrang hrang tarlangin Pangbalkawn khua pawh a theih ang anga thuam chhoh mek zel a ni tih a sawi a. Miten min tehna tura ka duh fo chu inthlan dawna kan election manifesto kha ennawn ula, khata tang khan kan tih tur kan hlen em tih hi lo inzawt thin rawh u a ti. NLUP sum sem chungchang tarlangin  ram leh mipuiin a kan chhawr tangkai theih dan ber sorkar chuan a ngaihtuah a. Vawi khata dawn tur zat kan inpe nghal lo hi nangmahni thatna tur liau liau a ni tih lo ngaihtuah nawn ang che u, a ti bawk a ni.

Kan hma lawka YMA General Conference Kolasib Sub Hqrs. YMA in a thlen tur chungchangah palai kal tur zawng zawngte chu neitu rilru pua conference thianghlim ber anih theih nana khawtlang leh Pathian duh loh laka fihlim turin Minister chuan a chah a ni.

Pangbalkawn a V/C House hawn thar hi Rs. 7,85,000/- senga sak a ni a, hei hi Bilkhawthlir RD Block huamchhung ami niin V/C 30 awmah tun thla chhungin a la sa ve lo V/C te ah sak tir hman vek tum a ni. He BNRGSK Building hian meeting hall, computer room leh recreation room te neiin computer leh hnathawhna tur hmanrua te a thuam a la ni dawn a, sorkar scheme hrang hrang NLUP etc.  thawh nana hman theih tur a ni dawn a ni.

Pu P.C. Zoram Sangliana hian vawiin vek khan Pangbalkawn II Anganwadi building thar Rs. 1,75,000 /- senga sak a hawng nghal a. He building sak nan hian sum a bei tham avangin Pangbalkawn V/C chuan anmahni pawisa Rs. 30000/- sen belhin khawtlang tha nen buiding hi an zo fel a ni. Vawiin vek khan  Pu C.L. Ruala MP Fund Rs. 4,00,000/- senga Pangbawlkawn khawchhung Field chei thatna tura retaining wall thawh mek chu a hmunah a en nghal bawk a ni.

Minister hi Kolasib leh Vairengte atangin sorkar hotuten an tawiawm a ni.