No.996/2021-2022 

Lunglei the 16^th June 2021 - Kumina Mizoram hmun hrang hranga kangmei chhuak chhui chiang tur leh hemi kaihhnawiha dan dinglai awm mek te zirchiang a, a tul anga hmalak dan tur rawtna siam tura Mizoram sawrkarin a ruat State Level Special Investigation Team (SIT) on Fire Outbreak te chu an Chairman Pu R.S Sinha, Chief Conservator of Forests (Administration) hovin vawiin khan Lunglei an rawn thleng. SIT Member - Pu C. Lalthanmawia, Director, Fire & Emergency Services, Pu Lalthafamkima Jongte, AIG (Ops), Police Headquarters leh Pu John LT Sanga, Director, Disaster Management & Rehabilitation-te an rawn tel kim a ni.

State Level Special Investigation Team (SIT) on Fire Outbreak te hian kumin Lunglei District-a kangmei chhuaka kangmei tuar nasa ber Zotlang VC area (ram kang zau zawng hectare 645 kang a chhut) chu tlawh hmasa berin kangmei chhuah dan tlangpui leh a thelh hna kalpui dan te, kangmeiin ram a tih chhiat dan te a hmunah an enfiah a. Hemi hnu hian Chanmari leh a chhehvel an tlawh leh bawk a ni. Heng ram kang hmunhma an tlawhnaah hian Lunglei DC Pu Kulothungan A, DFO Pi Lalrammawii Sailo,  Additional DC Pu M.Misael, Additional SP Pu Lalfakmawia leh VC member te an tel a ni.

Site inspection an neih zawh hnu hian Lunglei DC Conference Hall-ah a kaihhnawih sawrkar official-te, VC-te leh tlawmngai pawl thenkhat te nen thutkhawmna hun an hmang a ni. Meeting-ah hian Lunglei District-a kangmei chhuah dan te, a chhuahna hmun te, kangmei thelh a nih dan leh hemi chungchanga investigation kal mek te sawiho anih bakah kangmei hmachhawn tura hmanrua leh mihring neih dan te uluk taka thlirho a ni a.  Kangmei chhuah thulha rang zawka chetlak anih theihna tura hmalak tul te, bungrua mamawh te, awareness program kalpui dan tur te, kangmei thelh tura mi thlanchhuahte training pek dan tur te, kangmei chhuah thulha rang taka mipuiin report an thehluh theih dan tur te, VC level-a hmalak theih dan te zau taka sawiho a ni.

SIT Chairman Pu R.S Sinha chuan kangmei chhuah chhan, hemi kaihhnawih a dan hman mek te leh kang meiin thil a tihchhiat chungchang te chipchiar taka zir tura sawrkarin SIT chu a ruat thu sawiin July thlaah sawrkar hnenah rawtna an thlen thur thu a sawi a ni.