Vawiin chawhnu dar 2 khan State Level Sub-Committee on Fire Prevention chuan meeting pawimawh tak Pu Lal Thanzara, Parliamentary Secretary to CM leh he Committee Chairman nibawk hovin a office ah an nei.

 

 

Pu Lal Thanzara chuan, kumin thal nasa tak ah Mizoram-in ruahtui a hmuh loh avangin khua a ro nasa a, kangmei chhuak palh venna atan mitin ten tan nasa taka lak a pawimawh tih a sawi a, he Sub-Committee, State Level a hma la tu ber tur hian District Level leh mipui mimirah kangmei venna chungchang pawimawh thu uar taka zirtirna thehdarh a tul thu a sawi a ni.

Vawiin committee hian kangmei ven nana pawimawh hrang hrangte an sawi hova, hemi atana a sum hman tur mumal zawka a awm thuai theih nan Finance Department lamah pawh an nawr tan nghal a, District Level Fire Prevention Committee ten hma an lak tawh leh lak mekah te pawh a tul anga sum puk chawp a lo hmang lawk te an awm avangin theih tawp chhuaha sum hmuh anih theih dan tur an sawi ho.

NREGS sum hi mei kawng sial nan Home Minister, R.D. Minister ni bawkin hman tul a tih thu sawichhuah a ni a, State Level Committee Chairman, Finance Minister leh Chief Minister nibawk hnenah thlen nise an ti.

District hrang hranga kangmei veng tha, Village Level leh chanchinbu-a Kangmei venna chungchanga zirtirna pe tha te lawmman 1 na atanga 3 na thleng siam nise tiin hemi lo endik tur pawh Committee an ruat nghal bawk.

State Level Sub-Committee on Fire Prevention Chairman Pu Lal Thanzara chu District Level Committee in Kolasib-a an campaign-na ah tel se, member dangte pawh a tulna apiangah District Level Committee hun ruatah tel ve se tih an rel bawk.

Vawiin hian E & F, LR & S, Agriculture, LAD, PWD, Fire & ES, Aizawl S.P., I & PR Deptt. te bakah YMA, MUP, STAM, AMFU leh NSS aiawhte an tel a ni.