4129/2025-2026

Aizawl dated 23rd January 2026: Vawiin chhun khan Chief Wildlife Conference Hall, Khatlaah State Level Sub-Committee on Green Mizoram chuan thutkhawmna an nei a. Pu Rajeev Kumar Tiwari, Principal Chief Conservator of Forests chuan he hun hi a kaihruai a. Pu NC Saravanan, Chief Conservator of Forest (HQ) chuan kalkhawmte lawmna thu sawiin Conservator of Forests (CF) Central Circle, Northern Circle, Southern & Eastern Circle bakah Rural Development & Administration Department, Land Revenue & Settlement Department, I&PR, National Service Scheme (NSS), Central YMA, Association for Environmental Preservation (ASEP), Science Teachers’ Association Mizoram (STAM), Centre for Environment Protection (CEP), Green Mizoram Network leh Save Environment Association (SENVA) aiawhte he hunah hian an tel a ni.

Pu Rajeev Kumar Tiwari, PCCF chuan Mizoram chu ram nuam, boruak thianghlim leh nungchate zalen taka an chenna hmun, ram leilung hausakna tha taka humhalhna hmun a nih zel theih nan Sawrkara thawktute leh a chhunga cheng mipuiten thawhhona tha an neih a pawimawh thu a sawi a. Mizoram chu ram hring nuam tak a nih zel theih nan leilung hausakna venhim leh tih pun hna chu Department pakhat hna emaw, NGO pakhat mawhphurhna bik ni lovin, a chhunga cheng zawng zawngte mawhphurhna a nih thu a sawi a. He mawhphurhna pawimawh tak hi tha taka hlenchhuah a nih theih nan inzirtirna dik leh tha pek chhuah tam a pawimawh thu a sawi.

Central Circle aiawha report petu Pi Lalramnghaki, ACF tarlan danin kum 2025 khan thing tiak phun tur 25,645 sem chhuah a ni a, endikna kalpui hnuah thing phun atanga za zela 80.13 te chu tha takin an nung a ni. Northern Circle report petu Pi Indhu Vijayan, CF tarlan danin Northern Circle hnuaia khaw 3 atanga hmun 27 thlanchhuah ah thing tiak 2,240 phun a ni a, endikna neih hnuhnun ber khan chawhrualin thing phun zawng zawng atangin za zela 89.63 chu tha takin an nung a. Pu MZ Singson, Chief Wildlife Warden tarlan danin Dampa Tiger Reserve bakah Aizawl, Khawzawl leh Chhimtuipui Wildlife Division-a thing tiak 1,510 phun atangin za zela 93.24 chu tha takin an dam a. Pu Andrew Lalthlamuana, ACF chuan Southern leh Eastern Circle-a hmalakna report pe bawkin thing tiak sem chhuahte hi Herhse, Tlaizawng, Chawnpui, Bul leh April par te a nih thu a sawi.

Thutkhawmnaah hian kum 2025 chhunga thing tiak phun tura semchhuahte tha taka enkawl chhunzawm a nih theih nana hmalak dan tur te, ram ngaw humhalh leh thing phun pawimawhna inzirtirna uar zawka kalpui dan turte sawi ho a ni.