Vawiin khan State Level Task Force on National Railway Project in Mizoram meeting vawi 12 na chu Information & Public Relations Conference Hall-ah an thukhawm.
He committee Chairman Pu Zasanga, IPS (Rtd.) chuan Mizoram mipuiin Bairabi atanga Sairang rail kawng chu peih fel thuai a, hman hlan an nghakhlel hle tawh a. Amaherawhchu rokhawlhna hrang hrang avanga duh anga hmalak chak theih a nih loh avangin a pawi takzet a ni a ti.
Pu Zasanga chuan he rail kawng siam bul tanna atan hian Rs. 50 crores (Cheng vaibelchhe sawmnga) ruahman a ni a. Amaherawh chu ram lak tur leh compensation tul hmasa te chinfel theih a nih loh avangin Rs. 49 crores (Cheng vaibelchhe sawmli pakua) chu hman lohin pekkir leh a ni ta ni a ti a. Kum tharah ruahmanna thar nen sum tam zawk hmuh leh beisei a ni.
He rail kawngin a paltlang tur ram Forest Clearance neih hun leh a paltlang tur ram neitute compensation an beisei zatte endik a chinfel a nih hunah chak zawk a hmalak theih beisei a ni.
He State Level Meeting hi May thla laihawl velah neih leh nise an ti a. He meeting ah hian Pu C. Ramhluna, MLA leh Pu Hmingdailova Khiangte MLA te pawh an tel a ni.
