World Forestry Day hi kum tinin March 21 ah khawvel pumah mipui vantlangin ramngaw pawimawhna leh tangkaina hrang hrang kan hriat thar lehna ni atan leh ramngaw humhalh tura tan lak tulzia inzirtirna ni atan hman thin a ni.
Mizoram ah pawh he hun hi kawng hrang hrangin hman thin a ni a, kuminah pawh hian kawng hrang hranga hman a niin, chung zinga pakhat MZU leh College zirlai naupangte tana buatsaih 3 days training on Introducting to Nature Photography chu Environment & Forests Conference Hall, Tuikhuahtlang ah Pu H. Rohluna, Enviroment & Forests, Minister in vawiin zing dar 10:30 khan a hawng a.
Minister chuan kan ram kan tihchereu nasat avangin a chhunga cheng ramsate an tlem phah a, India khawpui dang metropolitan city-te a ramsa hmuh mai theih ang chite pawh kan khaw chhungah hmuh tur a awm ve tawh lo a ni. Ramngaw tha, Chhura rual han tih tur phei chu kan State zau zawng atanga zaa pakhat (1 %) pawh kan neih tlin loh avangin ramngaw siam leh tura kan vaia tan tlan a ngai a ni. Kan changkang chho ve ta zel a, ramsa that lova a thlalak nachang hria pawh kan pung chho ve ta zel a, a lawmawm hle rualin hmabak erawh kan la ngah hle. Kan rama thing leh mau, nauban hlu tak tak kan neih te hi a hlutna hriain ram dang ami ten min ruk sak thin a, heng kan ram rohlute hi an ramah ching pungin an lo patent mai ang tih te pawh a hlauhawm ta hial a ni. Hemi veng tur hian vawiina zirlai lokalte in tha tawk tih ka hria a, theihtawpa tan lak kan ngai a ni. MZU zirlaiten kan rama thil thar an hmuchhuak thin hi a lawmawm a, nungcha hlu tak tak kan neihte hmuchhuak thar zel tura tan la sauh sauh turin a chah bawk. Nature Photography ti tur pawh hian dawhtheihna, taimakna, sum leh pai bakah tha tam tak sen a ngai a ni a ti a.
Thusawitu dang Dr. Tawnenga, Principal, Pachhunga University College pawhin Forests Department a thawktute hriat lem lohvin department tan National Afforestation & Eco-development Board (NAED) a member niha angin Jhumland rehabilitation chungchangah te, Nationa Afforestation Programme (NAP) chungchanga meeting an neihna ah tan alo lak nasa ve hle thin tih a sawi. Pachhunga University College rama ramngaw tlem azawg an siam chu venpui turin mitin a ngen a ni.
He hun kaihruaitu Addl. PCCF, Pu Rosiam Vanchhawng pawhin thu sawiin, Mizote hi kan pi leh pute atanga sa kap ngaisang leh nawmsip atana ramsa kah ching min awptu British mite tih dan hmu a ngaisang hnam kan ni a. Tunlai khawvel changkang tawhah erawh chuan ramsate hi silai nen ni lovin thlalakna (camera) nena veh kan ching chho ve ta hi a lawawm hle a, thangtharte hian hma nasa taka kan lak chhoh a ngai a ni a ti.
Introduction to Nature Photography hi ni 19 - 21 March, 2012 chhungin neih a ni ang a, World Forestry Day ni tak 21 March, 2012 ah hian Sihphira Pu K. Lianthanga (Sinners Friend) huanah pratical photography leh bio-diversity zir turin an kal dawn a ni.
