Sairang thleng a rel kawng sialna tur vil tura din State Level Task Force chu a Chairman Pu Zasanga hovin vawiin chhun khan I&PR Conference Hall-ah an thukhawm a hnathawh dan kalphung tlangpui an thlirho a ni.

Vawiin meeting ah hian Kolasib leh Aizawl District huam chhunga rel kawng siam turin a mamawh ram lak dan dinhmun sawi ho a ni a. Kolasib District huam chhung Bairabi VC ram ah chuan ram lak chungchang hi tihfel thawkhat tawh a ni a. Bairabi VC area chhung ah hian mimal ram leh thlan a vaiin 359 lak tur te chu LSC 26 ; Periodic Patta Pass 6 ; V/C Pass 129 leh thlan 198 an ni. Zangnadawmna tur sum Rs. 5,15,07,964 mamawh a ni ang.

Hortoki VC area chhungah ram lak sak tur 589, Kawnpui VC - 159 ; Khamrang VC - 78 leh Mualkhang VC area ah 115 an awm thu meeting ah hian sawi lang a ni a. Thil tul hrang hrang chak taka bawhzuiin June thla chawhma lam ah chinfel theih beisei an ni.

Aizawl District huam chhunga ram lak tur endik hna pawh chak taka kalpui a nih dan leh June thla chhunga chinfel hman beisei a nih thu tarlang a ni bawk a.Northern Frontier Railway Dy. C.E Ashok Kumar pawhin he rel kawng siamna tura an thlen chin a hrilhfiah bawk.

Vawiina State Level Task Force meeting ah hian Mizoram sorkar a a kaihhnawih department hrang hrang Police, E&F, Transport, Revenue, Aizawl leh Kolasib DC aiawh te bakah member Pu Hmingdailova Khiangte MLA, Dr. H. Thansanga, leh Pu RK.Thanga te an tel a ni.