Vawiin khan Mizoram State Vigilance & Monitoring Committtee chu an Chairman Rural Development Minister Pu R. Lalzirliana hovin Secretariat Conference Hall-ah an thukhawm a. Mizorama Centrally Sponsored Scheme (CSS) hrang hrang kalpui mek leh hmasawnna te chipchiar takin an sawiho a ni.

Meeting hawnnaah Pu R.Lalzirliana chuan Committee member zawng zawngte lawmna thusawiin felfai leh dik taka ruahmanna hnuaiah CSS kalpui chu sorkar tih makmawh a ni a, mipuite chhawr tangkaitheih ngeina tura hmalak leh hnathawh a pawimawh hmasa ber a ni, a ti. Central Sorkara Ministry of Rural Development (MoRD) aiawha lo kal Pu Vum Mang pawh he meeting-a tel thei chu lawmawm a ti bawk.

Vawiina meeting-ah hian CSS hrang hrang - MGNREGA. IAY, CRSP/TSC, IWDP/HARYALI, PMGSY, SGSY, NSAP, IWMP leh DRDA (Admn.) - chungchang sawi ho niin a thuphungin heng scheme hnuaia hmalakna leh hnathawh chin te chu a lungawi thlak hlea hriat a ni a. State Vigilance & Monitoring Committtee hnunung ber nikum 19th August 2010-a hmalakna tur chhawpchhuah tam zawk pawh tih zawh anih tawh thu report a ni. Mizoram khaw then khata pit latrine siam te pawh commode-a thlak vek a nih tawh thu te, thingtlang khaw kilkhawr zawka kawng siam lamah pawh nasa taka hmasawn a nih thu te report a ni. MGNREGA hnuaia Job Card chungchanga thil hriatsual awm thin chu Job Card siam nan leh Card Holder chhinchhiah nana MIS Software an hman thin fel tawk loh leh internet chhe lutuk avanga district leh khaw hla zawk ten Card Holder thar belhna leh a hlui paihna duh anga an upload zung zung theih loh thin vang a nih thu sawilan a ni a. IAY hnuaia mi harsa zawkte insakna tur tanpuina pek a nih thin chu hlawhtling taka thawh a nih laia IAY hnuaia in sa ten IAY Sponsored-a insak an ni tih signboard emaw chhinchhiahna eng emaw tala an tarlan tur chu an zawm tha lo a ni tih thu sawilan a ni a, hei hi tun aia uluk zawka endik ni se tih rel a ni bawk.