North East Conclave on Urban Poverty Alleviation hmang tura lokal Ministry of Housing and Urban Poverty Alleviation (MoHUPA) a Secretary Pu Arun Kumar Misra leh a hote vawiina Aizawl lo thleng chuan Rangvamual leh Durtlanga mirethei, chenna in neilote tana UD &PA Department insaklai an tlawh.

Jawaharlal Nehru National Urban Renewal Mission (JNNURM) hnuaia Basic Services to Urban Poor (BUSP) hnathawh mek, Rangvamualah hian Building /Block 8 sak mek niin Block pakhatah hian chhungkaw 16 leng thei tura hisap a ni a. Building hi chhawng 4 a sak niin chhungkaw 368 chen theihna tura duan a ni. Rangvamual Project hnuaiah tho hian remchan zawkna avangin Edenthar vengah Block 15 dang sak a ni bawk. Durtlanga insak lai hi Block 20 niin a vaiin chhungkaw 320 vel khawsak theihna tura ruahman a ni. Chenna tur in bakah Livelihood Centre leh Community Centre pakhat theuh sak tum a ni bawk. Heng Project pahnih te hi June 2012 a peihfel beisei a ni.

Union Secretary rual hian MoHUPA a Additional Secretary Pu PK Mohanty, Joint Secretary Pi Aruna Sundarajan leh National Building Organisation (NBO) a Director hna chelhtu Pu DS Negi te an lokal a. UD &PA Secretary Pu R.L Rinawma, UD &PA Director Pu K. Lalthawmmawia leh Officer dang te bakah National Projects Construction Corporation Limited (NPCC) atangin mipawimawh thenkhatin an tawiawm a ni.