Vawiin khan Rural Development Minister Pu R Lalzirliana kaihhruaiin State Level Vigilance and Monitoring Committee te chu Secretariat Conference Hall-ah an thukhawm.

Pu R Lalzirliana chuan thingtlang mite hmasawnna tura sorkar laipuiin hmachhawp lian tham hrang hrang engemawzat State in a kenkawh te hi a chhawrtu mipui te ai mahin a kengkawhtu sorkar hnathawk ten an chian zawk fo avangin dik leh tangkai tur zawk nia an hriatah chuan huai taka hna kalpui thin tur leh kawng kawhhmuhtu ni turin a sawm a. Chutihlaia mipui tam zawkin lungrual taka duhdan an neih te erawh zah thiam turin a chah a ni.

Vawiina meeting-ah hian thingtlang khuate tana rotling leh tangkai thil siamna tura inhlawh fakna niza inhlawhna tih mai MGNREGS te, mirethei chenna insakna IAY bakah Mizoram State Rural Livelihood Mission (MzSRLM), Central Rural Sanitation Programme (CRSP), State Institute of Rural Development (SIRD), Pradhan Mantri Gram Sadak Yojana(PMGSY), Swarnjayanti Gram Swarojgar Yojana(SGSY), NSAP, Integrated Watershed Development Programme (IWDP), Integrated Wasteland Management Programme (IWMP) leh DRDA (Admn.) - chungchang chipchiar taka sawiho a ni a. District hrang hranga heng scheme kalpui a nih dan te thlirho a ni bawk.