Centrally Sponsored Scheme (CSS) hrang hrang Mizoram chhunga kalpui dan enzuitu State Level Vigilance & Monitoring Committee chu vawiin khan Rural Development Minister Pu R.Lalzirliana hovin Secretariat Conference Hall, Aizawlah an thukhawm.
Meeting hmasa thurel an bawhzui dan sawiho niin kum 2016-2017 sawrkar kum chhunga MGNREGA-a Mizoram sawrkarin a do letna sum chu State Planning leh Finance Department in a tih fel tawh thu te, PMAY-G/IAY, NRDWP leh scheme dangah pawh Planning leh Finance Department hian tih tur tul an tihfel tawh thu tarlan a ni. Nirmal Bharat Abhiyan (NBA)/Swaach Bharat Mission (SBM) hnuaiah kum 2016-17 chhungin Mizoram pumah ek in 2236 (APL-831, BPL-1405) siam a ni. Champhai chu Open Defecation Free ah puan a lo ni tawh a, Serchhip pawh ODF a puan theih thuai a ni dawn tih meeting-ah hian sawilan a ni. Mahatma Gandhi National Rural Employment Guarantee Act (MGNREGA) hnuaiah kum 2015-16 a sum hmuh tlai avanga kum 2016-17 a hman tak (spill over) cheng vaibelchhe 60 leh kum 2016-17 chhunga sum hmuh atanga inhlawhna siam zat chu District tinah ni 49 zel a ni a. Kum 2017-18 sawrkar kum atan Mizoram state tan a thawhkhatna (1st installment of 1st tranche) cheng vaibelchhe 134.4909 chu sawrkar laipui RD Ministry in a release tawh a, hei hi kum hmasa a MGNREGA sum hmuh zawng zawng belhkhawm nen a intluk pha thuak a ni.
Mi rethei, in nei lote tana in sakna tur sawrkar laipui hmalakna Indira Awaaz Yojana (IAY)/Pradhan Mantri Awaaz Yojana (Gramin) hnuaiah a phu ngei te thlan chhuah an nih theih nan mipui kalkhawm Gram Sabha in a pawmte thlan an ni a, amaherawhchu, kum 2011-a neih Socio Economic and Caste Census (SECC) nena inmil ngei tura sawrkar laipuiin a phut avang leh inmil lo tam tak a awm avangin hma lak chak theih a ni lo tih meeting-ah hian tarlan a ni a. Meeting-ah hian a chinfel dan ngaihtuahin chak zawka hmalak dan tur an rel. National Social Assistance Programme(NSAP) hnuai Indira Gandhi National Old Age Pension Scheme (IGNOAPS)-ah 2016-17 chhung khan beneficiary 25469, Indira Gandhi National Widow Pension Scheme (IGNWPS)-ah beneficiary 2310 awmin Indira Gandhi National Disability Pension Scheme (IGNDPS)-ah beneficiary 742 an awm. Kum 2016-17 chhungin NSAP hnuaia sum release tawh zat cheng nuai 1259.19 atangin 87.70% hmanral a ni tawh.
Pradhan Mantri Gram Sadak Yojana (PMGSY) hmangin kum 2016-17 chhung khan Aizawl District-ah kawngpui kilometre 45.67; Champhai District-ah kilometre 18.67; Lawngtlai District-ah kilometre 17.96; Lunglei District-ah kilometre 12.17; Mamit District-ah kilometre 13.56; Saiha District ah kilometre 39.02 leh Serchhip District-ah kilometre 74.01 a thui siam zawh a ni. MzSRLM hnuaiah sawrkar laipuiin 2016-17 chhunga sum hman a release zat cheng nuai 1186.34 atanga hnathawh nana sum hmanral zat chu cheng nuai 916.76 a ni bawk. Integrated Watershed Management Programme (IWMP) hnuaiah rain water harvesting structure 1562 siam a ni a, self help group 339 din a ni bawk.
State Level Vigilance & Monitoring Committee meeting-ah hian PHE Minister Pu Zodintluanga, Social Welfare Minister Pu PC Lalthanliana, RD Parliamentary Secretary Lt.Col.ZS Zuala, Pu Chalrosanga MLA, Er. Lalrinawma MLA bakah department hrang hrang Secretary, Director, DC te leh RD officer engemawzat an tel a ni.
