National Vector Borne Diseases Control Programme (NVBDCP), Govt. of India chuan 25th April hi ‘World Malaria Day’ – ‘Sikserh do ni’ atan a hmang thin a. Mizoramah pawh hemi ni pual hian World Malaria Day chu I&PR Auditorium ah hman a ni a; Lalrinliana Fanai, IAS, Commissioner & Secretary, Health & Family Welfare chuan khuallian niin a telpui.

Pu Lalrinliana Fanai chuan World Malaria Day-ah kum tin Malaria chungchang thupui hrang hrang thlan thin niin kum 2010-2015 khan ‘Invest in the Future: Defeat Malaria’ tih thuphui hmanga beihpui thlak a nih tawh laiin Malaria natna chu mi tam takin an la thihpui cheu avangin he natna nuai bova, thihna tih tlem tumin nasa lehzuala hmalak mek a ni, a ti. Kum 2017 atana Thupui chu ‘End Malaria for Good’ a ni a, Malaria case pakhat mah awm tawh lo tura tan lak chu Health Department mawhphurhna a ni tiin Health Commisioner chuan Mizoram State Vector Borne Diseases Control Programme (MSVBDCP) hmalakna, tlawmngai pawl hrang hrangte inpekna leh mipui tawiawmna avangin Mizoram ah Malaria case a tla hniam chho ve zel a, malaria vanga thihna  pawh zawi zawiin a tlahniam ve telh telh zel a ni, a ti a. Malaria case tlakhniamna chhan ni a lang pawimawh tak pakhat chu Thosilen damdawi a chiah sa (LLIN) sem vang leh mipui tawiawm na vang niin he LLIN hi 2016 khan Mizoram khaw 731 ah sem a ni, a ti.

Mizoramah kum 2015 khan Malaria vei mi 26400 an awm a, PV mi 3801 leh PF mi 22599 an ni. Malaria vanga nunna chan mi 21 lai an awm bawk a ni. Kum 2014 aiin Malaria hrik hmuh hrim hrim hi kum 2015 ah 3295 in an tam zawk a, chuti chung chuan Malaria avanga thi erawh chu kum 2014- a mi 31 an thih lain 2015 ah chuan 21 an thi a, 2014 aiin 10 in an tlem zawk ani. Kum 2016 Jan-Dec chhung in thisen exam zawng zawng mi 267747 niin heng atang hian Malaria vei hmuhchhuah zat chu mi 7583 niin, PV mi 1676 leh PF 5907 a ni. Kum 2016 chhung khan Malaria vanga nunna chan zat chu mi 9 an ni. Kum 2017 Jan-March chhung in Thisen exam zawng zawng hi 35801 niin, heng atang hian Malaria vei mi 582 hmuhchhuah tawh a niin, PV mi 96 leh PF mi 486 an ni.  Kum dang aiin case hi a tla hniam hle tur a ngaih a ni.                                                                                                                                       Malaria natna thehdarhhtu Anopheles thosi hi Mizoram ah a tam em em a. State Vector Borne Diseases Control Programme (SVBDCP) chuan theihtawp chhuah in Malaria tihrem nan hma a la mek zel a. Heng hmalakna zingah hian TV, Radio leh chanchinbu hmang te leh inchhung DDT a kah tir te a tel. Kumin hian Thosilen damdawia chiahsa (LLIN) hi a mamawh zualte ( Mi 1000 zela pakhat leh a aia tamin Malaria an veina hmun) hnenah  sem a ni a. A dawng tute zawng zawng hian an zar ngei ngei tur a ni a, a enkawl dan tur a inziak ang thlap a enkawl tur a ni. Heng bakah hian mimal invenna Thosi hlauh/huat cream te, hal chi Tortoise, Mortein, All Out te hi a hmang thei tan chuan a tha hle bawk. Malaria thlentu Anopheles thosi laka him nan mahni in leh a vel vawnfai te leh tui tling thosi pian theihna reng reng tihbo te hi mitin tih theih leh mawhphurhna a ni a, zawm theuh turin Health Department chuan mipuite a ngen a ni. 

World Malaria Day puala programme buatsaih,  Health & Family Welfare Principal Director  Dr. F. Lallianhlira kaihhruaiah hian Dr. HC Thangkima, Jt Director (Malaria) cum State Programme Officer (VBD) chuan World Malaria Day thupui, ‘End Malaria for Good’ tih hmangin Presentation a pe a– Malaria natna, invenna, Mizoram dinhmun leh Programme hmalakna te a tarlang.  Dr. H. Lalchungnunga, Director of Health Services chuan lawmthu sawina in he hun hi a khar a ni. World Malaria Day hi kumtin hmun hrang hrang ah hman thin a ni a. Vawiin ah pawh hian Mizoram a District hrang hrangah hman a ni a. April thla hi kumtin in ‘Malaria Do Thla (Anti-Malaria Month)’ atan hman thin a ni bawk.