Vawiin chawhma dar 11:00 am khan  National University of Educational Planning and Administration(NUEPA), New Delhi leh School Education Department, Government of Mizoram tangdun buatsaihin  School Evaluation chungchang zirhona workshop ‘Shaala Siddhi’hawnna inkhawm  chu SCERT Auditorium, Chaltlang, Aizawl –ah neih a ni a, School Education Secretary, Pu P Lalchhuanga, IAS-in a hmanpui.

Khuallian Pu P Lalchhuanga chuan mihring chhawr tlaka chherchhuah chu zirna-in a tum bulpui ber a ni a, chumi atana hmanraw pawimawh tak Shaala Siddhi(School Evaluation) chungchang zirhona buatsaih a ni chu lawmawm a tih thu leh he workshop-a tel zawng zawngte chu ngun tak leh thahnemngai taka an thil zirho te ngaihtuaha hlawkna chhar chhuak ngei turin a fuih a ni. Pu P Lalchhuanga chuan Shaala Siddhi kalpui turin zirtirtuten theihtawp chhuaha mawhphurhna an lak phawt chuan Mizorama zirnain nasa takin hma a sawn phah ngei a beisei thu a sawi bawk.

Ni hnih awh tur State Level Workshop on Shaala Siddhi hawnna inkhawm hi School Education Director Pu K. Lalthawmmawia,IAS – in a kaihruai a, Resource Person  Prof. Pranti Panda, Professor & Head, USSE, NUEPA, New Delhi pawhin Shaala Siddhi chungchang sawihawnna a nei bawk a, chawhnu lamah Workshop neih chhunzawm nghal a ni. He workshop-ah hian School Education Department-a Officer te, SCERT-a Officer te, Teacher Association hrang hrang hruaitute , SSA leh RMSA-a officer te leh zirtirtu thahnem tak an tel a ni.