4362/2023-2024
Aizawl, 27th March, 2024 : State Media Cell for Lok Sabha General Election, 2024 chuan vawiin khan DIPR Conference Hall, Lianchhiari Run-ah April ni 19, 2024 a Lok Sabha inthlanpui neih tura vote tla a tam theihna tura inrawnkhawmna hun a buatsaih a, Kohhran hrang hrang thalai hruaitute, Tlawmngai Pawl hrang hrang hruaitute, Mizo Zirlai Pawl hruaitute bakah hnam bil zirlai pawl hrang hrang aiawhte an tel.
Vawiin inrawnkhawmna hun hi Dr H. Lianzela, Addl. Chief Electoral Officer, Mizoram in a kaihruai a, Mizoramah chuan Lok Sabha MP thlanna aiin MLA thlanna ah vote tla a tam sang fal hle thin thu sawiin, MLA thlanna ah India rama vote thlak tha ber te zinga mi kan nih laiin a hnu lawk thla 4 vel lekah Lok Sabha MP kan thlang leh thin a, hetah thung erawh national average pawh kan pha thei ngai meuh lo a, mipuite a bik takin thalaite zingah vote tla a that leh zual theihnan kan zavaia kan tan tlan a tul a, hemi tur hian engtiangin nge hma kan lak ho ang a, kan thawhho theih ang tih sawihona hun an ruahman tih a sawi a ni.
He hunah hian resource person pahnih Pu Henry C. Lalrawnkima, Deputy Chief Electoral Officer leh Pu Zonun Sanga, Addl SP (Crime) ten powerpoint presentation hmangin Inthlanpui neih tawh a Mizoram dinhmun tlangpui leh Dan leh hrai zawm tur pawimawhte an sawifiah a, hemi hnu hian Addl. CEO kaihhruaina hnuaiah sawihona hun hman a ni a, rawtna leh ngaihdan pawimawh tak takt e sawiho a ni a, heng sawihona eng atang hian hmalakna thar duan tum a ni.
Vawiin sawihona hunah hian Mizoram Upa Pawl, Central YMA, Central KTP, Mizoram Thalai Kristian Pawl, Salvation Army Youth, North-East PYD, Mizoram PYD, Adventist Youth Ministries (SDA), Diocese Catholic Thalai Pawl, Mizo Zirlai Pawl, Siamsinpawlpi (Paite Zirlai Pawl), Hmar Students Association, Mizoram Bawm Students Association, Lai Students Association, Mara Students Organisation, Pang Zirlai Pawl, Central Young Chakma Association leh Bru Students Association aiawhte an tel a, he inrawhkhawmna hun hi Pu Vanlalringa, Senior Informatics Officer, ICT in lawmthu sawina hun hmangin a khar a ni.
