4363/2023-2024

Champhai, the 27th March, 2024: Samagra Shiksha, Champhai District buatsaih Champhai District Maths & Science Olympiad 2023-2024 neih zawh tak result puan leh lawmman semna chu vawiin chawhnu dar 1:00 khan Education Training Hall-ah neih a ni. He hun hi District Bawrhsap Pu James Lalrinchhana, Chairman, District Education Committee chuan a hmanpui a ni.

District Bawrhsap Pu James Lalrinchhana chuan Champhai District-ah hlawhtling taka Maths & Science Olympiad buatsaih a ni chu lawmawm a tih thu sawiin, hemi atanga kan dinhmun chiang taka phochhuah a ni chuan tanlakna leh hmasawnna thlen se a duh thu a sawi a. Pawl sawn hma ngeia thiam tur bituk thiam hman zel chu hmabak atana pawimawh hmasa a nih thu sawiin, ba nei tun chunga kal chhoh zel chu hmasawnna daltu a ni thei, a ti a. Zirlaite chu class mila thiam tur bitukte thiam tum zel turin a chah a; zirtirtuteah innghat pumhlum vek lova, mahni a inhaikuak tum turin a fuih bawk.

District Education Committee Chairman Pu James Lalrinchhana chuan zirna chu District chhunga hmasawn ngaihna lai leh ngaihpawimawh a nih thu sawiin, zirna kawnga hmasawn turin zirtirtu, zirlai leh chhungkua tanho a ngai a, quantity aimahin quality chu ngaihpawimawh tul a ni, a ti a. Naupangte'n nuam ti taka zirlai an zir theih nan zirtirtute chu boruak nuam siam tum turin a chah a, zirlaibu chhunga mi piah lamah anmahni tiphura tanpui thei turte pawh ngaihven tel turin a chah bawk a. Zirlaite chu maths leh science subject-te huphurh mai lova a bulthum atanga hriatfiah tum zawk turin a fuih a. Maths & Science Olympiad buatsaih chuan heng subject pahnihte hriat thiam leh ngainat kawngah zirlaite thinlungah rah tha a chhuah ngei a beisei thu a sawi bawk.

Thusawitu dang Pu C.Lalbiakzauva, District Project Coordinator, Samagra Shiksha, Champhai District chuan Maths & Science Olympiad buatsaih dan report a pek bakah NAS, 2021 report-in Champhai District dinhmun a tarlan dan a sawifiah a. Zirna kawnga tanlak a tulzia sawiin, kan tun dinhmun hian zirlai kan kaihruainaah rilru thar min pe se a duhawm hle a ni, a ti a. Zirlaiin a tum dik tak zirtir kawngah tanlak a tul thu sawiin, rote memorization/by-heart system ringawt ni lo, hriatfiahna tak tak inzirtirna ngaihpawimawh thar a tul thu a sawi a. Zirtirtute chu zirlaite ngaihtuahna hman thiam tir turte, thil chik peihna neihtir turte, a tak ngeia an thiam vena tur hawi zawnga mit, kut, ka, lei leh thluak hman thiam zirtir hlamchhiah lo turin a chah a. Zirtirtute'n kan zirtir dan kan thlak a, zirlaite pawhin an zir dan an thlak a nih loh chuan inzirtirnain a tum (objective of teaching) leh zirlaibu atanga thiamtir tur inphum (learning outcomes) te hi kan hlen lo viau zel dawn tihna a ni, a ti bawk.

He hun hi Pu H.Lalhminghlua, Addl. District Project Coordinator, Samagra Shiksha, Champhai District chuan kaihruaiin Pi Laldingliani Ralte, Dy. District Project Coordinator, Samagra Shiksha, Champhai District-in result kimchang a puang a. Lawmmante hi District Bawrhsap-in a hlan a ni.

Class VI, VII, VIII leh IX tana buatsaih Champhai District Maths & Science Olympiad 2023-2024 result kimchang chu hetiang hi a ni:-

(A) Class VI:
1. Lalhriatzuali, Govt. Roseland Middle School, Champhai
2. Calvin Vanlalrema, Oakridge School, Khawbung
3. Susanna Malsawmdawngkimi, Govt. Roseland M/S, Champhai
3. Vanlalngilneia Khiangte, B.C. Lalthlamuana English Academy

(B) Class VII:
1. K. Lalramchullova, B.C. Lalthlamuana English Academy
2. C. Malsawmsangi, Presbyterian English School, Champhai
3. T. Zothankimi, Presbyterian English School, Zotlang

(C) Class VIII:
1. C. Lalrohlui, Springdale Academy, Zotlang
2. Alycia Rohluzuali, B.C. Lalthlamuana English Academy, Champhai
2. C. Lalsangzuala, Springdale Academy, Zotlang
3. Zopuii, B.C. Lalthlamuana English Academy, Champhai

(D) Class IX:  
1. Maria Laldinliani, Zokhawthar Secondary School
2. Vanlalmalsawmdawngi, Govt. GM High School, Champhai
3. K. Lalhruaizela, B.C. Lalthlamuana English Academy, Champhai

Lawmman dawngtute hian Citation bakah pakhatnain pawisafai Rs 5,000/- , pahnihnain Rs 3,000/-  leh pathumnain Rs 2,000/- an dawng a. Heng bakah hian Class tin atanga Consolation prize dawngtu zirlai 5 te'n Rs 1,000/- leh Citation an dawng bawk.