4364/2023-2024

Champhai, the 18th March, 2023: Champhai District chhunga Bank hrang hrang kaltlanga Financial Year 2023-2024 December quarter tawp thlenga hmalaknate thlirletin District Consultative Committee (DCC)/ District Level Review Committee (DLRC)/ District Level Security Committee (DLSC) chu vawiin chawhnu dar 3:00 khan an Chairman, District Bawrhsap Pu James Lalrinchhana hovin DC Conference Hall-ah an thukhawm. He hunah hian Champhai District RD Block 2 huamchhunga Bank leh Stakeholder hrang hrangte hmalakna thlirho a ni. He hun hi Lead District Officer (LDO) Pu Mrinal Giri, Manager, RBI Aizawl in a hmanpui bawk a ni.

District Bawrhsap Pu James Lalrinchhana chuan mipui hnenah bank kalphung leh chhawr tangkai dan uar lehzuala zirtir a pawimawh thu sawiin, bank branch tinte chu financial literacy campaign tam zawk neih tum turin a fuih a. Credit Deposit Ratio tun aia tha zawk nei tura tanlak a tul thu a sawi a. Social Security Scheme-te ngaihpawimawh a tul thu sawiin, hemi kawnga bank hma la tha tawk lote chu theihtawp chhuah turin a chah a. Loan dil leh buaipui kawngah Line Department leh Bank Branch-te inkarah thawhhona tha a awm a tul thu sawiin, loan latute pawh mawhphurhna an neihte hriaa tha taka loan rul thin turin a chah bawk.

Pu Lawmkima, Lead District Manager (LDM) & Convener chuan kalkhawmte lawmna thu a sawi hnuah December quarter chhunga Champhai District Bank leh Stakeholder hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni.

Meeting-a tarlan a nih danin nikum December quarter chhunga Champhai District-a bank hrang hranga pawisa dahluh leh pekchhuah zat inthlauh dan khaikhinna Credit Deposit (CD) Ratio chawhrual chu 69.40% a ni a, quarter hmasa September 2023 quarter tawpa CD Ratio 68.27% aiin 1.13% in a pung a; hei hian CD ratio tha ni tura hniam lam bituk zat 60% chu a khum a ni. Hemi hun chhung hian bank-ah cheng nuai 55067.17 dahluh a nih laiin bank-in pawisa a pekchhuah zat hi cheng nuai 38214.35 a ni.

Social security scheme hnuaiah Pradhan Mantri Jeevan Jyoti Bima Yojana (PMJJBY) hnuaiah inziaklut 5429 awmin, Pradhan Mantri Suraksha Bima Yojana (PMSBY) hnuaiah inziaklut  7890 awmin, Atal Pension Yojana (APY) hnuaiah 616 an inziaklut tling a. Mudra Loan mi 338 te pek niin, cheng nuai 1817.12 a tling a. KCC/ST Crop Loan mi 247 hnenah cheng nuai 411.90 (15.11%) pek niin Bank chhawr tangkai dan inzirtirna Financial Literacy Campaign (FLC) tum 27 neih a ni.

He hunah hian bank branch-te hnen atangin pawisa thir an dawn reng theih thu ngaihthlak a ni a. Pawisa chhia hman tlak lohte thlak zung zung a nih theih nana hma la theuh turin bank-te chah an ni. Heng bakah hian bank-in sum a kawl theih zat Currency Management -Remittance leh Security chungchangte sawiho a ni bawk.

Financial Year 2023-2024 December quarter tawp thleng khan Champhai District-ah bank branch hrang hrang 18; Commercial Bank 5, Private Bank 5, Regional Rural Bank 7 leh State Cooperative Bank 1 bakah ATM 10 a awm a ni.