4365/2023-2024

Kolasib dated 27th March 2024: Vawiin chawhnu khan General Election to Lok Sabha 2024 neih tur atan a Expenditure Observer Pu Arvind Sharma, IRAS leh Police Observer Pu K.Satyanarayana, IPS te chuan Kolasib tlawhin inthlanna kalpui tur a inpuahchahna hrang hrang an endik a. DC Conference Hall, Kolasibah Nodal Officer, Asst. Expenditure Observer, Video Viewing Team, Video Surveillance Team, Flying Squad-te nen inkawm hona hun an hmang a, Pu John LT Sanga, Deputy Commissioner chuan hun a kaihruai a ni.

Expenditure Observer Pu Arvind Sharma, IRAS chuan Mizoram chu state ralmuang tak a nih angin inthlanna felfai leh thianghlim kalpui a nih ngei a beisei thu a sawi a. Chutih rual chuan General Election to Lok Sabha neih tur a Election Commission of India in inthlanna kalpuina tur a inkaihhruaina a duan te chu uluk tak a chhiar turin leh mawhphurhna hrang hrang awmte chu tha tak a hlenchhuak turin kalkhawmte a chah. Pu Arvind Sharma chuan candidate-ten intluktlang tak a vote an zawn theih nan ECI-in pawisa hman theih zat a bituk thu sawiin Assistant Expenditure Observer leh Team hrang hrangte chuan inthlan hma chu Campaign-na te uluk tak a an vil a ngaih thu a sawi a. Rinawmna nen dik leh huaisen tak a hna thawk turin kalkhawmte a chah bawk a ni.

Pu K.Satyanarayana, Police Observer chuan inthlanna kalpui chhung a harsatna awm thei zawng zawng uluk tak a zirchiang turin leh chung harsatna awm thei te chinfel zung zung a nih theih nan ruahmanna felfai tak siam theuh turin Team hrang hrangte chu a chah a. Inbiakpawhna leh inkalpawhna chungchang a harsatna awm thei te, ruihtheih thil chevel thlithlai leh silai leh puak thei thil khuahkhirhna kalpui dan te sawi ho a ni.

Hun kaihruaitu Pu John LT Sanga chuan Kolasib district chhung a Polling Station awm dan leh Polling Official inruat dan te tarlangin SVEEP kaltlang a vote thlak tur a mipuite zirtirna kalpui a nih dan a sawi a. Team hrang hrangte tanrualna leh thawhhona hnuai ah Kolasib district-ah Lok Sabha inthlanna chu tha tak a kalpui a nih ngei beisei thu a sawi.