4366/2023-2024

Kolasib dated 27th March 2024: Vawiin chawhma khan Krishi Vigyan Kendra, Kolasib district leh Indian Council of Agriculture Research tangkawp buatsaih ‘Mega Workshop on Natural Farming’ chu Pu John LT Sanga, Deputy Commissioner chuan a hawng a. Lo neitute hnen ah ‘Natural Farming’ tih thupui hmangin zirtirna pek niin hmanraw hrang hrang sem a ni a. A duh apiang tan thlai leh ran enkawl chungchangah mithiamte rawnna hun siam a nih bak ah Financial Literacy Campaign kalpui a ni bawk.

Mega Workshop on Natural Farming’ hawngtu Pu John LT Sanga, Deputy Commissioner chuan kut hnathawktute chu ei leh bar a kan intodelh theih nana kan ram inghahna pawimawh berte zing ami an nih thu sawiin India ram mipui tam zawkte chu lo nei a eizawng an nih thu a sawi a. Ei tur hrisel kan neih theih nana kut hnathawktute pawimawh zia chu kan hriat thar zel a tul thu a tarlang. Pu John LT Sanga chuan taksa tan a hriselna pe thei buh, thlai leh thei thar chhuah kawngah ‘Natural Framing’ kan intihhmuh zel a pawimawh thu sawiin chumi tur a KVK leh ICAR, Kolasibin loneitute tan Mega Workshop an buatsaih chu lawmawm a tih thu a sawi a. Ei leh bar intodelhna kawng a Kolasib district-in hma a sawn zel theih nan Mega Workshop chu hmang tangkai turin kalkhawmte a chah a, KVK leh ICAR-a mithiamte kaltlang a thiamna hman tlak chhar chhuah tum theuh turin a fuih.

Dr. Michelle C.Lallawmkimi, Sr. Scientist & Head, KVK, Kolasib chuan kalkhawmte lawmna thu sawiin Pu Zohlunpui, SMS (Agronomy) chuan ‘Natural Farming’ tih thupui hmangin zirtirna a pe a. ‘Natural Farming hnuai a thlai ven dan’ tih thuziak tlangzarh niin Dr. Carolyn Zothansiami, SMS (Soil Science) chuan lawmthu sawina hun a hmang bawk a ni.