Chief Minister Pu Zoramthanga chuan nimin khan New Delhi a State Minister's Conference on Jal Jeevan Mission buatsaih ah a tel. He Conference hi Jal Shakti Minister, Gajendra Singh Sekhawat leh Minister of State for Jal Shakti Rattan Lal Kataria te kaihhruaina hnuaiah neih a ni a; state hrang hranga PHE leh Water Resources Minister te leh sorkar mi pawimawhte an tel a ni.

He hunah hian Chief Minister Pu Zoramthanga chuan thu sawiin, Mizoramin kum tin ruahtui tam tawk tak a dawn thin thu leh, ruahtui dah khawlna tha a tam tawk loh avanga thalah tui harsatna hmun tam takah a thlen thin thu te leh tui dahkhawlna tha tak a awm chuan he harsatna hi sutkian theih a beiseiawm thu a sawi. Pu Zoramthanga chuan he Mission, Prime Minister Modi-an kumin Independence Day lawmnaa a tlangzarh chu ropui a tih thu leh lawmawm a tih thu a sawi a. A tihlawhtling turin Mizoram sorkar chuan theihtawp a chhuah tur thu a sawi bawk.

Union Jal Shakti Minister Pu Gajendra Singh Shekhawat chuan he conference ah hian state tin an tanrual chuan Jal Jeevan Mission thiltum chu an tihlawhtling thuai ang a ti.

Jal Jeevan Mission hi kumin Independence Day lawmnaah khan Prime Minister Pu Narendra Modi chuan kalpui a nih tur thu a puang a. He hmalakna hian tun hun leh hun lo kal zel tura mamawhna tur ngaihtuah tel chunga tangkai leh remchem taka tui hman leh lak dan te a huam a. Centre leh State te tangkawp a hmalakna tur a ni a. He Mission hnuaiah hian India rama chhungkaw tinte chu kum 2024 ah chuan tui thianghlim hnianghnar taka an hman tur pek vek tum a ni a, ruahtui tla a tam thei ang ber dah khawl tura ruahman a ni. Hemi tihlawhtling tur hian sorkar bakah tlawmngai pawlte leh khawtual mite a zau thei ang bera he hnaah hian teltira hman tangkai tum a ni bawk.

Attachment

  • Loading attachment...