Vawiin chawhma dar 10:00 khan Champhai DC Conference Hall-ah State Planning Board Vice Chairman Pu Lalkhama'n Champhai District chhunga sorkar Department hotute kawmin District hmasawnna ruhrel hrang hrangte a sawipui.
Pu Lalkhama chuan Champhai District chu India hmar chhak tawp Myanmar ramri dep a awm anih vangin ram inrelbawlna kawng a hmasawnna hrang hrangah District danga awmte aia tanla zual tura fuihin, sorkar laipui hmalakna 'look east policy' kalpui kawngah entawn tlaka mahni hna rinawm tak leh taima taka thawk tura a ngen bakah hmasawnna sum hailut tura ruahmanna tha neih atul rualin leilung luahtu mipui a lununga tam in awmzia a neih thu a sawi bawk.
Ramin hmasawnna rahbi a zawh mekah miretheiten dinhmun tha an chelh ve theih nan kan sorkarin retheite chawi kanna tur State Flagship Programme NLUP a kalpui mekah tih tak takna nena hmalatu chhungkuate chu an ding chhuak ngei dawn a, hlawk hlai lutuk lova thingtlang loneih bansan a nih chuan Ramngaw siamna kawngah awmze nei zawkin hmalak a ni dawn a, Mizoram hi Acre Nuai 52 a zau niin, ram Acre 30 vel hi NLUP hmanga mipui eizawn theihna tura duan ani thu Pu Lalkhama chuan tarlangin, mitinin thatpuina atan an hman theih nan sorkar Department hotuten thuk zawka luhchilhpui a pawimawh thu a sawi bawk.
He inkawmhona-ah hian Champhai District chhunga hmasawnna ruhrel lian tham deuhte tarlan a niin, koritu zawk leh chak zawka hmalak anih theih nan Champhai District Development Committee emaw District High Power Committee din ngei tul an tih thu leh State sorkar pawhin hmasawnna siam tham sum ruahman tura an duh thu sawilan a ni a, Pu Lalkhama pawhin theih ang tawka lo bawhzui a inhuam thu a sawi.
Champhai District chhunga hmasawnna ruhrel lian tham deuh tarlan zingah Champhai zawl Sesih tlang a Hellipad siam leh Kelkang ram, Lungdup tlanga Airport siamte, Champhai a Cold Storage tangkai zawka hman dan turte, Old DC Complex a Auditorium sak turte, Keilung liah lui khuahte, Champhai Tlangsama Aieng siamna hmunpui ruahman te, Indo-Myanmar Border Trade tihpuitlin thuai an duh thute, Inbiak pawh na BSNL service khawpkham tawk lohna ti phuisui turte, inkalpawhna kawngpui, a bikin Seling to Zokhawthar via Champhai Double Lane Highway laih thuai anih theihna tur te, Zokhawthar to Falam leh Zokhawthar to Tidim Double Lane Highway laih anih thuai theihna tura chak zawka hmalak an duh thu he meeting-ah hian tarlan a ni.
Vawiina inkawmhona-ah hian Champhai District chhunga sorkar Department 20 chuang a hotute kan kal kim hle a, Pu Lalkhama hian vawiin chawhnu khan Indo-Myanmar Border Trade Point Zokhawthar tlawhin a kal nghal.
