State Prohibition Council chu vawiin khan Chairman Pu J.H.Rothuama hovin State Guest House ah an thu khawm a. Meeting hmasa a an thurel bawhzui dan te thlir hovin kumin Krismas leh Kumthar vuakveta hmalakna tur te an sawi ho.

State Prohibition Council meeting ah hian Mizoram-a Zu khapna dan hman mek chungchanga pawl hrang hrangte ngaihdan lak khawm te leh Presbyterian Synod-in mi 1008 hnen atanga zirchianna a neih te ngaihthlak a ni a. Mizoram-a Total Prohibition Dan hman chungchang zirchiang tur hian MLTP Act, 1995 Study Group din a lo ni tawhin chumi hnuai ah chuan Sub-Group pawh siam a ni a. State Prohibition Council chuan an hma lak zel na tur ah Study Group ten sorkar a report an thehluh hi ngaihchan ni se, an ti a ni.

Vawiina Council meeting chuan kumin Krismas leh Kumthar vuakveta Tlawmngai Pawl duty te chu tawiawm leh tha an ti a. December 23 zan hian member te insem darhin group hrang hranga tlawmngai pawl duty na hmun an tlawh dawn a ni. Kumin January atanga November thlenga Excise department ten sap zu leh spirit an man atanga revenue an hmuh chhuah hi Rs.158,15,298.00 a ni a. Chawitir leh bungraw hrensak atangin Rs.47,66,150.00 an hmu bawk a ni.