Education Minister Pu Lalsawta’n vawiin khan Phunchawng Secondary School building leh Zotlang Secondary School building, Rashtriya Madhyamik Shiksha Abhiyaan (RMSA) sum hmanga sak thar te chu a hawng.

Phunchawnga sikul hawna programme-ah thusawiin Pu Lalsawta chuan RMSA ruahmanna hnuaia sikul building changtlung tak leh zirtirtu thiamna sang tak neite hmanga Phunchawng khawtlang in zirna lama rahbi thar an kai tur chu  lawmawm tiin khawtlang tan ni chinchhiahtlak tak a ni, a ti a. Sikul hmingchhiat emaw a hmingthatna kawngah zirtirtu ten mawhphurna sang tak an neih angin khawtlang mipuite pawhin hemi sikul enkawlna kawngah hlenchhuah tur thui tak an neih ve thu Minister chuan a sawi.

Pu Lalsawta chuan Zotlang Secondary School building hawnna programme-a thusawiin kum 1944 a Mizo High School din anih atangin Mizoramah Zirna in hma a sawn chak hle chu Pathian remruatna a ni, a ti a. Ram leh hnam anga Mizoram din chhuah theihna kawng pawimawh tak chu Zirna a nih thu Minister chuan sawiin, Zirna kawngah Mizote chu an tha thlawt a, hnamdang tluk lohna an nei bik lo a ni, a ti bawk. Pu Lalsawta chuan naupangte enkawla, hlawhtlinpuia, khawtlang leh ram tana mi tangkai leh chhuanawm tak tak chherchhuak thei hna – Zirtir hna chu a ropuia, hemi aia mihring nuna lawmna pe thei a awm tam lovang a ti.

Vawiin a School building hawnna programme te hi RMSA State Project Director Pu T Rohmingliana’n a kaihruai a, Local Council, YMA leh MHIP hruaitu te pawh an tel bawk a ni.

Vawiina School building hawn tak ah te hian Classroom pali theuh awmin, Science Laboratory te; Computer Room te; Art, Culture & Craft Room te; Library Room te, Principal Room te, Teacher’s Common Room te bakah mipa leh hmeichhe naupang inthiarna tha tak a awm a ni.  Sikul building pakhat sak nan hian cheng nuai 55,50,460 senral a ni.