Vawin chawhnu dar 2:00 khan Pu S.Laldingliana, Parliamentary Secretary chuan RMSA Secondary School Hrangchalkawn-ah building thar a hawng.

He huna thusawitu Pu S. Laldingliana chuan Hrangchalkawn leh a chhehvel mipuiten an chhawr tangkai theih tura RMSA Secondary School Building thar sak a ni thei ta chu lawmawm a tih thu a sawi a. Zirna pawimawh zia leh thiamna dik tak pawchhuak tura tan lak a pawimawhzia sawiin naupangte hi nitin, englai pawhin tha taka buatsaih chunga kan hmachhawn a ngai a ni a ti. He school atang hian mithiam leh hnam rotling thahnem tak chhuak ngei se a duh thu a sawi lang bawk.

RMSA Secondary School building thar hi Rs. 55.5045 lakhs a sak a ni a, Class Room pali (4), Science Laboratory, Library Room, Teachers Common Room, Headmaster Room bakah Computer Room-te awmin Class pakhatah hian naupang 35 zel awm thei tura ruahman a ni.

He building thar hawnna puala inkhawm hi Pu Zaduna, District Project Co-ordinator, RMSA in a kaihhruai a. Pu Lalmuankima, Co-ordinator in Technical report a pe bawk.