Mizoram State Prohibition Council chu vawiin khan an Chairman, Excise &Narcotics Minister Pu J.H. Rothuama hovin I&PR Conference Hall ah an thukhawm a, Mizoram Liqour Total Prohibition Act, 1995 zir chiang tura din Study Group Report an thlirho.
State Prohibition Council chuan zu khapburna dan, Mizoram Liqour Total Prohibition Act, 1995 chu kum 14 lai hman a nih hnuah a hlawhtlin leh hlawhtlin loh leh mipuiin he dan hi engtin nge an ngaihzel tih te, a nghawng te leh hman zui zel chi a ni em tih te zir chianna neih tula hriain January 24, 2011 khan Study Group a din a. Pu H. Raltawna, IAS (Rtd) kaihhruaina hnuaiah he Study Group hian uluk tak leh fimkhur taka hma lain zu in khawtlang nun leh ei leh bar a nghawng dan zirtur Sub Group a din a, tlawmngai pawl hrang hrang te hnenah a hlawhtlin leh hlawhtlinloh chungchanga an ngaihdan te a la, Mizoram University mithiam ten zu in Mizo thalaite leh hmeichhiate a nghawng dan zirbingna an nei a, zu leh mihring man zat leh hrem an nih dan te Exice & Narcotics leh Police department in record an neih te a zir chian bakah zu in avanga hriselna a khawih pawi dan Medical lam mithiam te hmangin a zir bawk ni.
Study Group chuan heng zawng zawng hi a thlir hnuah zu khap bur hlawhtlin harsatna chhan ber chu demand a san em vang a nih thu leh demand titlem tura hmalak a tul hle thu te, zu khap burna dan chu hman zel a nih dawn chuan Excise &Narcotics Department tihchak ngaia a hriat thu te, tlawmngai pawl te tih phur a tul thu leh MLTP Act, 1995 chu tlem a zawng siam that ngaia a hriat thu te State Prohibition Council hnenah a thehlut a ni.
Meeting-ah hian member kalkhawm ten an ngaihdan zalen takin an sawiho a. Member thenkhat chuan MLTP Act hi tun dinhmuna Mizo Society thlirin tha riha an hriat thu leh kalpui zui zel tha an tih laiin Member thenkhat te erawh chuan a nihna ang anga kalpui zui zel chu thalo zawka hriain hlih mai thaa an hriat thu an sawi bawk. State Prohibition Council chuan he meeting-a member te ngaih dan hlawm hnih hi sorkar thu neitute hnenah a hriattir dawn a ni.
