Vawiin chawhma dar 11 khan BRC Hall Serchhip-ah Soil & Water Conservation Department hnuaia Hmunphiah leh Rubber chin thlangtute hnenah NLUP tanpuina sem a ni.

Vawiina tanpuina sem inkhawmah hian Serchhip khaw chhunga Village Council hrang hrang paruk huam chhunga chhungkaw 36 te hnenah NLUP thawh hnihna atana tanpuina hmasa ber sem chhuah a ni a, Hmunphiah chin thlangtu chhungkaw 8 leh Rubber chin thlangtu chhungkaw 28 te hnenah tanpuina pawisa Rs. 5,000 theuh pek a ni a. Heng tanpuina pawisate hi sum faia hlan lovin loneitute Bank Account-ah dah luh sak an ni. Tanpuina sem anih rual hian loneitute hnenah thlai enkawl dan tur ziahna lehkhabu an sem tel nghal bawk.

He inkhawm hi Pu H.L. Chungnunga, District Soil & Water Conservation Officer, Serchhip District chuan a kaihruai a. Thu sawiin Pu Chungnunga chuan tuna tanpuina pawisa an pek chu lovahna tur a nih thu sawiin, lo an vat anga chutah chuan buh leh thlai dangte pawh a chin phawt theih thu a sawi a, kum tharah Rubber tiak nungsa phun tur an sem leh tur thu a sawi bawk a ni. Chutih lai erawh chuan hmunphiah tiak erawh loneitute'n anmahnia an inngaihtuah a tul tur a sawi bawk.

Rubber tiak lak chungchangah sawrkar chu theihtawpa a fimkhur thu leh Rubber Board Certified Nursery a mi nilo chu Rubber tiak an supply loh tur thu a sawi bawk a ni.

Pi Rosy Lalmuansangi Hmar, ASCO pawhin thu sawiin Rubber chu thing tha tak a nih thu leh a hnai lak a nih tawh loh hnu pawha inchhung bungraw siamna atana thing tha tak a la nih thu te sawiin, loneitute chu taihmak chhuah lehzual turin a sawm bawk. Serchhip District Soil & Water Conservation Department hian tunkar chhung khan Serchhip District-a khaw hrang hranga trade hrang hrang thlangtu chhungkaw 174 te hnenah tanpuina sum hi an lo sem tawh a ni.