Vawiin chawhnu khan Chief Minister’s Conference Hall-ah Health & Family Welfare Minister Pu Lal Thanzara kaihhruaiin Falkawn Referral Hospital tihchangtlunna kawnga harsatna awm thei hrang hrangte leh a sutkian dan ngaihtuahin H&FW, PWD, PHE leh P&E Department hotute an thukhawm.

Health Minister Pu Lal Thanzara chuan sawrkarin Falkawna State Referral Hospital tihpuitlin a tum ruh hle tih sawiin sawrkar Department hrang hrangte nen thawhhona tha tak neih a tul thu a sawi a, hemi kawnga PWD, PHE leh P&E department-te’n an tawiawmnaah lawmthu a sawi bawk.

Meeting-ah hian Falkawna State Referral Hospital-in Medical Council of India (MCI) tehfung hrang hranga a tlin ngei theihnan ruahmanna hrang hrang siam a ni a. PWD chu Hospital compound chhung inkalpawhna leh Muallungthu leh Khumtung inkar kawng leh Samtlang leh Hualngo inkar kawng siam mek te chak zawka bawhzui tura tih a ni a. Hei bakah hian Hospital compound chhung cheimawi kawngah H&FW Department hotute nena thawk dun tura ngen a ni bawk. PHE Department ve thung chu State Referral Hospital-in hnianghnar leh chatlaklo a tui a dawn theih nana hma la tura tih niin Hospital leh Quarters-a semdarh chunchangah pawh hma a la dawn a. Eng mumal leh voltage sang zawk State Referral Hospital hian a mamawh reng dawn avangin P&E Department chu H&FW department hotute nen inrawna hmala tura ngen an ni bawk.

Meeting-ah hian H&FW Commissioner bakah H&FW, PWD leh P&E department hotute an tel tha hle.