Vawiin chawhnu khan Health & Family Welfare Commissioner & Secretary, Pu Lalrinliana Fanai, IAS kaihhruaiin a Office Chamber-ah ‘State Level Task Force Committee for Pulse Polio Immunization’ an thu khawm.

Meeting kaihruaitu Pu Lalrinliana Fanai chuan member lo kalte lawmna thu leh an hmachhawp hrang hrangte tihlawhtling tura thawh ho a tul thu a sawi a.

Eastern & South East India Region-WHO-a Regional Team Leader, Dr. Debashish Roy-a chuan khawvel pum huapah Polio Type-2 a awm tawh loh thu sawiin, trivalent oral polio vaccine (tOPV) chu bivalent oral polio vaccine (bOPV) hmanga thlak tawh tur a nih thu a tarlang a. India sawrkar pawh bivalent oral polio vaccine (bOPV) hmang tura a inbuatsaih thu leh April ni 25, 2016 chu National Switch Day atana thlan fel a nih thu a sawi bawk.

NPSP-WHO, Mizoram Unit, Surveillance Medical Officer Dr. Lalhlimpuii chuan kumin January ni 19-21-a hman zawh tak, National Immunization Day chungchang a report a. State Task Force Committee chu H&FW Secretary hova neih a nih thu leh District tinah DC hovin District Task Force an thut khawm tawh thu a sawi bawk. New Mobile Team-te chuan Aizawl Civil Hospital, Synod Hospital leh private hospital thenkhatte tlawhin naupang kum 5 chin hnuai lam, mi 300 chuang hnenah polio vaccine an pek thu a tarlang a. PHC hrang hranga Vaccinators Training an neih dan a sawi bakah thawktu indaih lohna avanga an harsatnate a tarlang nghal a ni.

State Immunization Officer Dr. Lalzawmi’n National Immunization Day thawh hnihna, tun thla February ni 23-a hmang tura an inpuahchah dante tarlangin, District zawng zawngte pawh kaihhruaina pek an ni tawh tih a sawi a. District Task Force Committee pawh an thut khawm leh dawn thu leh PHC thenkhatin Medical Officer an neih loh avanga harsatna an tawh thu a sawi tel bawk.

Committee-ah hian Health & Family Welfare Department, Social Welfare Department, District Council hrang hrang, WHO, UNICEF, Rotary Club leh MHIP General Headquarters aiawhte an tel a ni.