Nimin 12th October, 2015 khan Pu Lalhmingthanga, IAS, Principal Secretary, Health, Chairman, State Level Task Force Committee on Immunization hovin Secretariat Conference Hall, Aizawl-ah meeting pawimawh tak neih a ni.
Meeting-ah hian Dr.Lalhlimpuii, Surveilance Medical Officer, WHO chuan Mission Indradhanush (Hri danna beihpui) lo awm tur kenkawh dan chungchang hrilhfiahin he beihpui hi karkhat awh zelin thla 4 chhung neih tur a ni a, Mizoram chhunga District 7-ah neih tur niin April leh May 2015 khan Lunglei, Lawngtlai, Saiha leh Mamit-ah neih a lo ni tawh a, Fur avanga kawngpingte a lo awm avangin October-ah sawn hlat a nih thu leh hemi rual hian Aizawl East, Aizawl West leh Serchhip-ah pawh tan ve tum a ni bawk. He beihpuiah hian naupang kumhnih hnuailam tana a thlawna hri danna sawrkarin a pekte la thei lote chhui chhuaka an kum phu-a Vaccine la kim vek tura sawrkar hmalakna a nih thu tarlan a ni bawk.
Dr.Lalzawmi, SEPIO pawhin hri danna thar Pentavalent (vawi khat inchiu-a Vaccine 5 awm) chi Mizoramah a vawikhatna atan pek tan nghal tur anih thu sawiin he vaccine-ah hian vawi khat chiu-ah DPT, Hepatitis ‘B’ leh Haemophilus Influenza B Vaccine naupangin a rualin a dawng nghal tawh dawn a ni. Pentavalent Vaccine chungchangah hian Helath Workers te training pek vek an ni tawh a, nausen DPT Vaccine la la lo te chauhvin an dawng thei ang a, DPT lo la tawhte chuan DPT in an chhunzawm dawn a ni.
He meeting-ah hian chak tak leh hlawhtling taka hmalak a nih theih nana harsatna awm te sawihovin a sutkian dan turte sawiho nghal a ni bawk.
He State Level Task Force Meeting-ah hian Dr.K.Lalbiakzuala, Mission Director, NHM bakah members te an tel tha hle a ni.
