Vawiin khan State Working Committee on National Foundation of Teachers Welfare Fund chu Minister Pu Lalsawta, Chairman Office Chamber-ah an thukhawm a; Mizorama Zirtirtute hamthatna tur ngaihtuaha thutkhawm hmasak ber tum ni hialin a rinawm. Kumtina Teachers Day, September ni 5 a hman dawn thutkhawm an tlai thin avangin Fund hmuhna lama harsatna awm thei sutkian tuma Committee-in tan la in, ‘kuminah chuan Teachers Welfare Fund thahnem tak hmuh theih nan sum tuakna ngaihtuahin, theih tawpa hmalak a tulzia mipui zirtirna pawh pek nise, tiin a rel ta a ni.

Hemi kawnga hma la turin Pu B. Lalchhuanliana, Joint Director hovin Committee an thukhawm thin ang a, committee-in an lo ngaihtuah zel dawn a ni. Tin, tanpuina an pek thin. Mizoram chhunga Hospital-a lutte Rs 5000/- leh State pawn akal Rs 7000/- pek thin chu instalment-a pe lovin, tum khata pek zel ni tawh se, tih an rel bawk.

He Committee Chairman Pu Lalsawta chuan, Mizoram-ah hian Teachers Day hlutna ngaihsak lo an tam ta hle in a lang a; Mizo mipuiten Zirtirtute hi mi zawng zawng tana thawhsaktu an nih hriattir a tul thar hle a, Kan fate zirtirtute hi kan chawimawi a, an harsatnaah nasa zawka tanpui an phu a ni,’ a ti. Teachers Day aiin thildang a ri ring zawk ta zel a, ngaihhlut tur dik mipuiten kan hriat a pawimawh hle a ni, tih a sawi bawk.

Kumin chhungah hian Zirna lama mi hmingtha, National & State Awardees te bakah heng a hnuaia mithiam thlan chhuahte hi Radio, Doordarshan, Local Cable Television - LPS leh ZONET-a tihchhuah turin heng mi thiam (Educationist) te hi interview nise an ti: 1) Dr L.N. Tluanga; 2) Rev. Dr Lalchungnunga, Ex Principal of Serampore College; 3) Rev. Dr. R.L. Hnuni, Principal, AICS.

District tinten Fund tam lehzual hmuh chhuah tumin, arang thei ang bera Directorate-ah thehluh zel nise; Sum hmuhte pawh kumtin Audit zel ni tawh se an ti bawk.