Mizoram State Level Working Committee for Celebrations of Teachers’ Day chu vawiin khan School Education Directorate Conference Hallah School Education Minister Pu H. Rohluna kaihhruaina hnuaiah neih a ni.

Committee hian Teachers’ Day a zirtirtute duhsakna thuchah Mizoram pum huapin Chief Minister leh Education Minister ten nei se a ti a, zirtirtute chawimawina lam ziak banners te hmun ualau lai apiangah tar nise ti bawkin, District tinah DC ten thuchah nei nei bawk se a ti a. Zirtirtu, an kawppui leh fanau damlo te tanpuina tur Teachers’ Welfare Fund chungchang sawiho bawkin, kum danga sumtuak dan thin bansan a, sorkar leh private schoola zitirtuten Rs.50/- theuh thawh tawhin, zirlai naupangte pawh an tlin tawk ang zela tihluihna awmloa thawh ve tura ngen ni se committe chuan a ti a.

Teachers’ Daya zirlaiten an zirtirtute duhsakna thilpek an hlan thin chu sorkarin a khap tawh thu committeeah hian tarlan a ni bawk. Teachers’ Welfare Funda an sum dinhmun tarlangin tunah hian Rs. 14,50,865/- an nei a. Welfare Fund atang hian zirtirtu, an nupui/pasal leh an fanaute damlo tanpuina thin, phaia enkawl ngai (refer case) ah Rs. 7000/- ni thin chu kumin 2016 Teachers’ Day atangin Rs. 10.000/- ah tihsan leh tualchhunga damlo enkawl tanpui nana Rs.5000/- ni thin pawh Rs.7000/- ah tihpun nise committee chuan a ti a. Ni 1.7.2015 - 30.6.2016 chhungin damlo mi 73 tanpuina pek an nih thu tarlan a ni bawk.

Committee ah hian district hrang hrang atangin aiawh te an tel bakah Pu Joseph Lalhimpuia, Parliamentary Secretary, School Education department hotu te an tel a ni.