Vawiin chawhma Dar 11:00am khan Mizoram Youth Commission bul tuma Education Department in a buatsaih “Student Exposure Tour” a Serchhip District atanga school naupang thlan chhuah,  Lawngtlai District  tlawh tur te chu Serchhip Education Complex tual atangin Pu K. Saitluanga, Serchhip District Information & Public Relations Officer in a vailiam.

Pu K. Saitluanga chuan, zirlai te, sawrkar hnathawk te, ram leh khawtlang hruaitute tan chuan mahni State chhung chinchang nanana hi chu hriatchiana, bel a tha a. Chu chuan hriatna a tipunga, inunauna te, mamawh inhriat sak tawnna leh harsatna inhriattiam puina te a thlen thei a ni, a ti a. A tel tura thlan chhuah naupangte chu an vannei hle a a hriat thu sawiin, hlim tak leh tluang taka kal turin a vailiam a ni. He hun kaihruaitu Pu Lawmawma, DEO pawhin Exposure Tour buatsaih anih chhan te sawiin, naupang thlanchhuahte chu tluang taka kal turin a duhsakna a hlan a ni.

He Student Exposure Tour, District hrang hrang atanga zirlai naupang thlanchhuah ten District dang an tlawh kualna tur ruahmanna; March, 2018 atanga bul tan niin a taka naupangte kal hun tur atan School Education Department chuan 5^th- 8^th November, 2018 ni se tiin a lo rel tawh a. Chu ruahmanna ang chuan vawiin hian District hrang hrang atangin zirlaite an kalchhuak hlawm ang. Aizawl District zirlaite Champhai ah an kal anga, Champhai naupangte Siaha ah, Kolasib naupangte Lungleiah, Lawngtlai naupangte Kolasib ah, Lunglei naupangte Mamit ah, Siaha naupangte Aizawl ah leh Serchhip naupangte Lawngtlaiah. An kalna District theuhva District thuneitute nena inkawmna hun buatsaih sak an nih dawn bakah, zirna in hrang hrang te leh hmun pawimawh thlan bikte tlawh pui an ni dawn a ni

He Exposure Tour programme hnuaiah hian vawiin vek hian Mamit District atangin zirlai naupang 36 leh Guide Teachers te chuan Serchhip an rawn thleng ve bawk dawn a. Mamit Team te hian Sainik School, Chhingchhip an tlawh anga, hun remchang a awm chuan Serchhip Bawrhsap kawmna an nei anga, Thenzawl lam te pawh an la tlawh thla leh bawk dawn a ni.