Chief Electoral Officer Pu SB Shashank chuan November ni 5 zing dar 10 khan Secretariat Annexe Building 1 Conference Room ah press conference a ko a. CEO chuan Principal Secretary Home sawn a nih chung changah pawi a tih thu sawiin Election Commission of India duh dan anga inthlanna fel leh thianghlim a awm theih nan CEO a nih angin a mawhphurhna a hlen a ni, a ti. Principal Secretary Home sawn a nih chungchanga thil thlen dan hetiang hian a sawi:-

1)Tripura a Bru raltlante E/Roll Revision:

New Delhi ah July ni 3-a Ministry of Home Affairs, Govt. of Mizoram, Govt. of Tripura leh Bru hotute nen inremna an lo ziah tawh angin Bru-te Mizoramah an lo kir hnuah State Government rawtna angin Election Commission of India chuan roll revision neih a rem ti a. Review neih niin Mizoram Bru lo kir an tam tawk lo tih hriat a ni a, pawl palite inkara inremna hi kalpui hleih theih a ni ta lo va. Chuvangin, Commission chuan roll revision hi camp-ah neih ni se a ti a. Roll revision hi August 2018 khan Tripura transit camp ah neih a ni.

2)Form bo chungchang:

Form 5400 chu District Election Office, Mamit atangin 23/24 August zanah a bo a. DC/DEO chuan hma la nghalin rinhlelh thil thuah mi thenkhat man turin thu a pe a. State Government chuan DC/DEO Mamit chu law and order chungchangah transfer turin rawtna a siam ta a. He rawtna hi Commission chuan pawmpuiin DC/DEO chu transfer a ni. Mawhphurhtu nia lang tualchhung hruaitu thenkhatte pawh charge sheet an ni.

3) Roll Revision a inrawlhna:

11 September, 2018 khan CEO chuan DEO leh ERO te hnenah lehkha thawnin Identification Slip te chu Bru migrante te bona fide residence nihna nemnghehna document atana hman theih a ni, a ti a. September ni 13, 2018 ah Principal Secretary, Home chuan thupek chhuahin Identification Slip chu repatriation atan chauh hman theih a ni, a ti ve thung. September ni 24, 2018 ah CEO chuan roll revision neih laia harsatna thlen thei thil nia ngaiin Home Secretary order chhuah chungchangah sawifiahna a dil a. Sawifiahna hi thla khat hnu October ni 24, 2018 ah tihchhuah a ni a, he sawifiahna ah hian document pawm leh pawm loh thu chu Election Office thuneihna a ni, a ti. Commission chuan hemi chungchangah hian Chief Secretary leh Principal Secretary Home hnenah October ni 17, 2018-a Aizawl a meeting an neih tumin sawifiah turin a phut a. Mahse sawifiahna fumfe tak erawh a awm thei ta lo a ni. 

4) CAPF: 

District tina DC leh SP te nen inthlana force mamawh tur chungchang sawiho a ni a. Force mamawh zat tur pawh Police Headquarters ah chhut a ni. Mizoram State Police force awm zat hriat a nih hnuah a indaihlohna hnawhkhat turin CAPF mamawh zat Ministry of Home Affairs-ah thlen a ni a. Vawi tam tak CEO hova meeeting neih a nih hnuah CAPF mamawh zat hi Ministry of Home Affairs-ah thlen niin an ni chuan Company 40 thawn luh rem an ti ta a. Principal Secretary, Home chuan PHQ-ah Mizoram Police Officer te meeting a neih pui a. Home Department atang hian Deputy CEO hnenah CAPF heti zat mamawh a nih chhan leh an duty dan tur kimchang zawhna a siam a. Hei hi CEO chuan inthlanna venhimna pek thu ah Home Department hi a inrawlh niin a ngai a ni.