No.3338/2021-2022

Aizawl 9th December, 2021 : Vawiin khan Mamit District-a Suarhliap khuaah Goodwill Foundation leh SBI Foundation hmalakna-a buatsaih Digital Smart Classroom chu Suarhliap High School-ah Pu H. Lalrosanga, Deputy District Project Coordinator, Mamit District Samagra Shiksha chuan a hawng.

Digital Smart Classroom hawngtu Deputy DPC Pu Lalrosanga chuan Goodwill Foundation leh SBI Foundation te hmalakna-a hetiang Digital Smart Classroom Suarhliap High School-a hawn a ni ta chu lawmawm a tih thu sawiin, zirlaite'n nasa taka an tangkaipui ngei a beisei thu a sawi.

He hunah hian Emmanuel Zoramsanga, Project Manager, Goodwill Foundation pawhin kalkhawmte hnenah thu a sawi bawk.

Goodwill Foundation hian Mamit District chhung khaw hrang hrangah nasa takin development hna an kalpui mek a, khaw sawm pahnihah Mobile Medical Unit kalpuiin, nimin khan Bawngva khuaa puanthui training Rural Self Employment Training Institute (RSETI), Aizawl nena an kalpui mek chu second batch kharna hun hman a ni a. Mi 60 laiin puanthui training an zo tawh a ni. Heng bakah hian Darlak, Bawngva, Sabual, Phaizau leh Suarhliap khuaah te hmasawnna hna tam tak thawh mek niin heng khuaah te hian Covid-19 hripui leng avanga harsatna tawk chhungkuate hnenah tanpuina an lo pe tawh bawk a ni.

Digital Smart Classroom hawnna inkhawm hi School Headmaster Pu Lalremruata'n a kaihruai a. Suarhliap khawtlang hruaitu VC te leh Pawl hrang hrang hruaitute bakah Suarhliap High School zirlaite leh Goodwill Foundation staff engemaw zat an tel a ni.