No.3337/2021-2022

Aizawl 9th December, 2021: Rural Development Pu Lalruatkima chuan vawiin chawhnu khan Border Area Development Programme (BADP) 2015-2016 & 2019-2020 sum, cheng nuai sawmli leh pahnih (Rs. 42 lakh) senga sak Leithum Community Hall a hawng. He hunah hian RD Minister hi East Tuipui bialtu MLA Pu Ramthanmawia, Bamboo Link Road Board Vice Chairman chuan a tawiawm a ni.

Community Hall hawnna hun Pu C. Lalromawia, VCP Leithum kaihhruaiah Pu Lalruatkima chuan thu sawiin, khawchhak unaute harsatna an tawh mek karah ramri dep khuaten theihtawp chhuaha an lo tuamhlawm leh enkawlzui thin chu fakawm tiin, State sawrkar pawhin raltlante dawnsawn leh tuamhlawm kawngah sawrkar laipui a dawr reng thu a sawi a. Mirethei leh harsa zawkte chawikan kawngah sawrkarin theihtawp a chhuah mek zel thu leh, nitin khawsak mamawhte hnianghnar taka mipui ten an neih zel theih nan sawrkarin tan a lak chhunzawm zel dawn thu a sawi a ni.

Minister chuan sawi chhunzawmin khawvel ram pum, a changkang ber atanga a hnufum ber thlenga chawk buaitu Covid-19 hrileng dolet kawngah lungthu kima Kohhran, NGO leh Sawrkar lungrual taka an tangrual thei chu ropui a tih thu sawiin, mipuite chu fimkhur chhunzawm zela sawkar leh VLTF in himna tura inkaihhruaina a siamte zawm hram hram turin a sawm a. Hnam anga dinchhuah nan unau inhmangaihna, induhsakna leh zonun zemawite chhawmnun zel tur leh, Sawrkar hmalaknate tha taka thlawp thin turin mipuite a chah a, faina leh thianghlimna ngaipawimawh fo turin a sawm nghal bawk.

Bialtu MLA Pu Ramthanmawia, Bamboo Link Road Board Vice Chairman ni bawk chuan Leithum khawtlangin Community Hall thar a nei chu a lawmpui thu sawiin, tangkai taka hman a nih theih nan duhsakna a hlan a. Khawtlang hruaitute chu miharsa zawkte ngaihven renga chanhai leh chhumchhiate tana malsawmna nih tum turin a chah a. Harsatna an neihte a hnena thlen hrehlo turin a chah nghal bawk a ni.

Thusawitu dang RD Director Pu R.Lalthazuala chuan East Tuipui biala hmasawnna hrang hrang leh department kaltlanga hmalakna awmte tha taka hlenchhuah a nih theihna kawnga khawtlang mipuite tawiawmnaah lawmthu a sawi a. Sawrkar atanga hamthatna lokalte awmze nei zawka hman tangkai a nih theih nan khawtlang inrawnkhawmna Gram Sabha te ngai pawimawh zel thin turin a chah bawk.

Leithum Community Hall hi a dung feet 78, a vang feet 50 leh a san zawng feet 24 a ni a. Community Hall Leithum hi BADP 2015-2016 hnuaiah cheng nuai 22 senga sak zawh tur a ruahman niin, Plan & Estimate pawh siam a ni a. Amaherawhchu a hmun hmain a zir loh avang leh Plan and Estimate aia lian a rel a nih avangin he sum hmang hian sak pum a ni ta lo a, a sak zawmna tur sum thun nawn leh tum a nih laiin Leithum BADP Cover Area atanga paih a ni leh lailawk a. Sak chhunzawm tha tih a nih angin 2019-2020 ah khan BADP cover area ni lo mah se justification-te nen tangkawpin cheng nuai sawmhnih dil belh leh a ni a. Sanction hmuh a nih hnuah kum 2020 October thla khan sak zawh a ni.

Rural Development Minister hi a enkawl RD Department, Revenue leh I&PR Official ten an tawiawm a ni.