3531/2022-2023

Aizawl, 9th February, 2023 : March ni 2, 2023 a Aizawl-a neih tur G20 Business Meeting inpuahchahna kal mekah vawiin khan hemi puala din Information & Publicity sub-committee chu an Chairman Pi H.M. Hualsangi, Secretary, Information & Public Relations hovin a pisa-ah an thukhawm.

Vawiin meeting hian Core Committee on G20 Business Meeting in an kuta hmachhawp an dahte bawhzui a nih dan an thlirho a, hmalakna chi hrang hrang an neih tawh zingah School Education Director kaltlanga zirna in hrang hrang leh Higher & Technical Education Director kaltlanga College leh institution hrang hranga zirlaite hnenah G20 chungchang inzirtirna (awareness campaign) neih a nih tawh thute, All India Radio-ah live phone-in programme neih a nih tawh thute , TV talk show vawi 2 neih turah vawi 1 neih a nih tawh thute tarlan a ni a, hmachhawp zingah Delegation handbook peih fel tep a nih thute, radio jingles leh promotional video clip siam mek a nih thute tarlan a ni bawk.

Information & Publicity sub-ommittee hian G20 business summit chhunga programme pawimawhte full video coverage an siam dawn bakah documentation an ti nghal dawn bawk a, live coverage an tih dawn bakah chanchinbuah display advertisement an pe dawn bawk a ni.

Information & Publicity sub-committee ah hian I&PR Director chu member-secretary a ni a. Higher & Technical Education Director, School Education Director, OSD-cum-Joint Secretary, Home Department, MZU, DDK, AIR leh I&PR officialte an tel a ni.