3532/2022-2023

Aizawl, the 9th February 2023 : Vawiin khan Home Commissioner Pu H. Lalengmawia, IAS, Nodal Officer for Overall Coordination of G20 Business Meeting leh Power & Electricity Department Secretary ni bawk hovin P&E Office Kawlpetha, MINECO ah Aizawl khawpui chhunga cable leh internet hrui inzam hnawkte senghawia felfai zawka hengte zam chungchangah cable tv aiawhte leh internet pechhuaktu sumdawngten (ISP) an sawiho.

Meetingah hian Aizawl hmel lanna hrang hrang zinga khawpui chhunga hrui hnawk, a bik takin cable leh internet pekchhuahna hrui inzam nasa lutuk hian khawpui hmel a timawi lo tih sawilan niin, thla leh maia G20 palai lo kal tur ten Aizawl hi khawpui fai leh thianghlim taka min hmuh theih nan hengte hi felfai zawk a zam a tul avanga meeting hi koh a nih thu sawi a ni a. Hemi chungchangah hian hmalakna lo awm tawh te sawilan niin hmun thenkhatah chuan Aizawl DC hmalaknain hrui hman tawh loh senghawi leh la hman mekte felfai taka zam a nih dante sawilan a ni a, G20 meeting denchhenin hemi chungchangah hian hma lak zel dan tur zau taka sawiho a ni a, rawtna te siam a ni tel bawk.

Meeting ah hian UD & PA Department aiawh te, BSNL aiawh te, cable tv, Internet Service Provider leh mobile company – Jio leh Airtel aiawhte an tel a ni.

Tarlan tawh thin angin Aizawlah hian March ni 2 khian G20 Business Meeting nghah a ni dawn a, inpuahchahna hrang hrang Sub-Committee 9 ten an kalpui mek a. Aizawl a cable tv leh internet pekchhuahna hrui inzam hnawk lutuk hi meeting hrang hranga sawilan fo niin felfai zawkin hengte hi zam thei ni se tiin rawtna te a awm a. Tun hma pawhin hemi chungchangah hian Aizawl DC pawhin hmalakna an nei tawh thin a ni.